دونیا قادین‌لار گونو موبارک اولسون
شعرلر(4)
سوسن امینی- چئویرن: گولناز
(1)
گونش سنده دوغور
و منده باتیر؛
آنجاق
سن اونون باشلانغیجیندا دورارکن
بو دوغوم ، باتیم قورتارمایاجاق.
(2)
خاطیره‌لرین ساکینلشدیریر-
باش آپاران کؤنلومو؛
فصیل- فصیل آددیملاییرام انتظاریندا
و سن‌ایسه چکیرسن-
فصیل‌لرین شکلینی دورمادان.
کاش
فصیل‌لری‌نین بیری اولوب،
آسیلیردیم یالقیزلیغی‌نین دوواریندان.
(3)
یوخوما گلیرسن هر گئجه
اولدوزلو گؤزلرله
و آیلی بیر پاپاق‌لا.
من
گئجه‌نين قوجاغيندا
سنین شيرين خاطیره‌لرینله
بیر پاييز يارپاغي کیمی-
فيرلانيرام … فيرلانيرام یونگولجه‌سینه
هئچ واخت یئره دوشمه‌دن؛
سانكي
یوخلاییبدیر يئرین جاذیبه‌سی.
(4)
بو گئجه سحره‌جک
سما‌ایله بیرگه آغلاییرام،
کولک‌له بیرگه اینله‌ییرم،
و آغاجلارلا بیرگه اویاق قالیرام؛
زامانی
اوره‌ییمین دؤیونتولری‌له کؤکله‌میشم.
اینانیرام… اینانیرام
صاجاح اوره‌یی آچیلاجاق سمانین،
یئنه‌ده اوخشایاجاق منی کولک،
یئنه‌ده چیچکله‌نه‌جک آغاجلار،
و یئنه‌ده
اوره‌ک‌لر دؤیونه‌جک بیر- بیرینه.
(5)
كاش
كؤينك اولایديم
سن‌سه گئييردين مني
و من، سنينله بيرلشیرديم؛
سنینله دولاشیردیم چای‌لار بویونو
یا پاییزلی بیر تپه‌نین هوندورلوگونو
یاداکی
پنجره قیراغیندا دوروب، سیگارئتینی سوموران واخت؛
بلکه‌ده
ائویمیزین دالینداکی باغچالی کوچه‌نی.
آی منیم ایل‌لریمین تانیشی
سوسن، یاسمن‌له ناخیشلانان
بیر کؤینگی گؤزله‌ین وارمی؟