(۱)
کولک اوتاغیمین باجاسیندان
ایچه‌ری سوروندو
و منی قوناق ائله‌دی اؤز رقصینه.
یاس چیچه‌یی آچیلدی جانیمدا،
و کولک اویویاراق خیالیمدا
چیچک‌لرین خاطره‌سیله-
یاواش- یاواش نفس چکدی منی.
(۲)
پوزدوم تنهالیق سازیمی چالان
گئجه سوکوتونو؛
و شامین ایشیغی‌لا سیلدیم
گئجه‌نین قارانلیغینی؛
گونش چیچک‌لندی
و حاصارین اوچماسی‌نین مژده‌سین وئردی.
(۳)
گوناهسیزلیغین درینلیگینی
گؤزلرینده اوخویورام.
و اؤلچورم بئینیمده:
بیر چوخور آچیلیر اوندا-
بوتون آغریلاریم قده‌ر؛
و آنیرام کی،
منیم‌ده بیر گون
سنین گوناهسیزلیغینجا
بیر گؤزوم وار ایدی.
سن و من
او گوناهسیزلاریق کی،
گوناهدان دوغولموشوق.
(۴)
او گون کی صولح گؤیرچینی
سنین پنجره‌نده اوتورار،
من،
سنی سیخ- سیخ باغریما باسارام؛
و اوینایا- اوینایا
سحر باغیندان بیر چیچک دریب،
عطیرلنه‌رم؛
و سنینله
صولح ائوینه گئده‌رم.
ایضاح:
“سوسن امینی” ۱۳۴۷ینجی ایل آذربایجانین میانا شهرینده دونیایا گؤز آچیب؛ دیپلوما قده‌ر تحصل آلمیشدیر. عائله قوردوقدان سونرا تهران و اصفهان شهرلرینده یاشاییب، ایندیلیکده اؤلکه‌دن خارجده – نروژ اؤلکه‌سینده – عائله‌سیله بیرلیکده یاشاییر. شعرلری عمومیتله فارس دیلینده‌دیر و بیر سیرا اثرلری داخلی مطبوعات و اینترنت صحیفه‌لرینده یاییلیبدیر. شعرلرینین آذربایجانجا ترجمه‌سی ایلک دفعه اولاراق “ایشیق” سایتیندا وئریلمیشدیر.
2 پاسخ
سلام. گوزل ایدی . اللرینیز ساغلیق
sag olun xanimlar. duygulariniz daha gujlu olsun dilerim