ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

 yashar kamal
ساري ايستي
ياشار كمال- چئويرن: ارسلان فصيحي

 اوشاق: «آنام»- دئدي، «آناجان، مني ساباه سحر تئزدن، گون‌ چيخماميشدان اويات».

– اگر يئنه اويانماسان؟

– اگر اويانماسام، ايينه سوخ اتيمه، توكلريمي چك دؤي مني.

اوزو سولغون، اينجه قادينين قارا گؤزلري سئوينجلي بير پاريلتي ايچينده قالدي.

– يئنه ده اويانماسان، اوندا نئجه؟

– اؤلدور مني.

قادين وارگوجو ايله اوشاغي قوجاغينا آليب، باغرينا باسدي.

– جان بالا جان، دئدي.

– اگر اويانماسام …- اوشاق دوشوندو. بيردن «آغزيما بيبر سوخ»- دئدي.

آناسي يئنه ده، عئيني مهريبان‌ليقلا، گؤزلري ياشاراراق اونو باغرينا باسيب اؤپدو. اوشاق دال‌بادال دئييردي:

–           باخ، اگر اويانماسام، آغزيما بيبر سوخ ها!…آنا «جان!» – دئيير.

– بيبر چوخ آجي اولسون

اؤزونو ازديرير، اركؤيونلوكله، آرا وئرمه‌دن قيشقيرير:

– آجي بيبر، قيرميزي بيبر … آغزيمي ائله يانديرسين كي … ائله يانديرسين كي … ديك آياغا دوروم.

آناسي‌نين اليندن قورتارير، همين سورعتله ياتاغا گيرير.

– اورك بولانديران بير ياي گئجه‌سي … گؤيده تك- توك اولدوزلار، يئكه تكره بنزر بير آي… ياتاق تورشاميش تر قوخوسو وئرير.

يئرينده اويان- بويانا دؤنور، سونرا بير قرارا گلير: «سحره‌جن ياتماياجاغام». سئوينير. سحر چاغي آناسي «عثمان»- دئيه‌ن كيمي، تئز قالخيب بوينونا ساريلاجاق. آناسي نه‌قده‌ر حئيرت ائده‌جك بو ايشه! ياتاغين ايچينده سئوينجله هوپلانير. سئوينجي بير آن سؤنور، ايچينه قورخو دوشور: «بيردن يوخوم آپارسا، اوندا نئجه اولار؟» اؤزو- اؤزونه دال‌بادال تكرار ائدير: «يوخلامارام، يوخلامارام داي! نه‌يه گؤره يوخلاييم».

آز سونرا آناسي گليب ياتاقدا، اونون يانيندا اوزانير. اوشاغي اوخشايير:

«بالام»- دئيير، «يوخلادين؟»

عثمان هئچ دينمير. آناسي قوجاقلاييب اؤپور عثماني. عثمانين ايچيندن ايليق- ايليق بير سئوگي، عئشقه، محبّته بنزه‌ين آغلاديجي بير شئي‌لر كئچير. سحري گؤزله‌يير. آناسي نئجه حئيرت ائده‌جك. تكجه دوشوندويو شئي بودور كي، سحر تئزدن دوروب آناسي‌ني حئيرت‌لنديرسين.

آنا يوخلاييب، عثمان ياتاقدا اويان- بويانا دؤنور. گؤز قاپاقلاري آغيرلاشير. عثمان اؤزونو ائله راحات بوراخمير.

بير آن قالخيب، درين- درين نفس آلان آناسي‌نين اوزونه باخير. اوز آي ايشيغيندا آي كيمي پاريلدايير. هؤروكلو ساچلاري ايندي داها قارا گؤرونور هؤروكلو اوزون ساچلار ياستيغين آغليغيندا گؤزه چارپير. هؤروكلرده پيريلتي وار. اوزون زامان ساچا، آغ- آپباغ اوزه باخير. سونرا باشي آغيرلاشيب ياستيغا دوشور.

گئجه ياري‌سي چوخدان كئچيب، اطراف گوندوز كيمي ايشيق‌دير. آلاچيغين آلتيندا ياتان اينه‌يين گؤوشمك، ديشلري‌نين قيجيرتماق سسي گلير. يوخو يامان باسيب اونو. يوخلاياجاق. ديشلريني سيخير. قوللاريني ديشله‌يير. هر نه ائله‌سه ده فايداسي يوخدور، يوخو بير سو كيمي دؤرد يانيني توتوب، دورمادان يوكسه‌لير، هيرس‌لنير، سونرا گولومسه‌يير. هيرس‌لنير، گولومسه‌يير. سحره ياخين آناسي‌نين بوينونو قوجاقلايير. قوللاري آناسي‌نين بوينوندادير …

آي غرب‌ده‌كي دوزنلييه دوغرو ائنيب، ائله بيل بير اوجو تورپاغا ديه‌جك. بير آزدان يئره باتاجاق. ائله بيل شرق‌ده‌كي داغلارين داليندان اينجه، آغ بير ايشيق فيشقيرير، داغلارين تپه‌سي ياواش- ياواش آغارير. كندين اينك‌لري بؤيورمه‌يه، كندده بير شئي جانلانماغا باشلادي.

آنا ديز چؤكوب، ترپنمه‌دن، سس- سمير چيخارتمادان اوشاغا باخير. اوشاغين باشي ياستيغين قيراغينا دوشوب، بوينو چؤپ كيمي‌دير. اوزو ساپ- ساري. اوشاق نفس بئله چكمير. بالاجا اوزو آلاجا قارانليقدا خيال كيمي گؤرونور … آنا اونا باخا- باخا آه چكير …

اوشاق بيردن بير قولونو ملفه‌نين آلتيندان چيخارتدي. قولون قالينليغي آنجاق بير باش‌بارماق قده‌ر اولار. دري‌سي او قده‌ر قيريش- قيريش‌دير كي، ائله بيل سومويوندن قوپوب تؤكوله‌جك … آنانين گؤزو قولا ايليشدي، قالدي. سونرا دريندن بير «آه»- دئدي، «بالام آه ..»

ترپندي، ايكي طرفينه ساللاندي. اوشاغين يانينا گئتدي. «اوياتماياجاغام»- دئدي. «اوياتماياجاغام، اگر آجيميزدان اؤله‌جه‌ييك‌سه، قوي اؤلك. بير اوشاغين ايشله‌مه‌ييندن بير شئي چيخماز كي».

گؤزلري آريق قول‌دادير. ايندييه‌جن اوشاغين بو قده‌ر آريق اولدوغونو نئجه باشا دوشمه‌دييينه حئيرت ائديردي.

– اگر آجيميزدان اؤله‌جه‌ييك‌سه، قوي اؤلك.

اوزون، هؤروكلو ساچيني آغزينا آپاريب، هيرس‌له چئينه‌دي. آشاغي‌دان اري باغيردي:

– يئنه ده اويانمادي؟

قادين يالواران بير سسله دئدي:

– نه ايسته‌ييرسن اوشاغين جانيندان؟ هله بالاجادي، بارماق بويدادير، سوموكلري سينار، ائله ظريف‌دي كي …

اري عصب‌لشدي:

– بو گون موطلق اويانمالي‌دي، سنه اويانمالي‌دي دئييرم! ايشله‌سين، تنبل‌لييه عادت ائله‌مه‌سين. اوشاقليق‌دا گر‌ك سوموكلري بركييه.

قادين دئيينه- دئيينه، قورخا- قورخا دئدي: «قولو او قده‌ر آريق‌دي كي، …»

اوشاغين باشي‌نين اوستونه گئتدي. اؤزونو هئچ جوره راضي ائده بيلميردي كي، بو توك كيمي يونگول اوشاغي اويانديريب، قيزمار گونشين آلتيندا ايشله‌مه‌يه گؤندرسين.

آشاغي‌داكي عصبي سس: «اويات اونو»- دئدي. «بير شيلله قوي قولاغي‌نين ديبينه. مصطفي‌آغاگيله سؤز وئرميشم. بو گئجه ياريسي هاردان اوشاق تاپاجاقلار، هه؟»

قادين دئدي: «آي كيشي، اوره‌ييمدن گلمير آخي. ائله ظريف‌دي كي … اونون ايشله‌مه‌يي ايله بيز بيه پوللو اولاجاغيق؟»

كيشي دئدي: «اگر ايندي‌دن ايشله‌مه‌يه عادت ائله‌مه‌سه …»

قادين اوشاغين باشيني، توكلريني اوخشادي. ياواشجا «عثمانيم»- دئدي. «عثمانيم اويان، قالخ آياغا بالام … گون چيخدي عثمان».

اوشاق ناله ائله‌دي. ياواشجا بير بؤيروندن او بيري بؤيرونون اوستونه دؤندو.

– بالام، عثمان، گون چيخيبدي …

اوشاغين چيينيندن توتوب قووزادي. ائله ياواش توتموشدو كي، ائله بيل سينيب تؤكوله‌جك… تزه‌دن ياتيرتدي.

«اويانمير داي، اويانمير. اؤلدوروم؟»

تئز آلاچيق‌دان آشاغي ائندي. آلاچيق بئشيك كيمي ساللاندي.

كيشي قيشقيردي:

«آللاه سنه ‌ده لعنت ائله‌سين، اونا دا … نئجه ياني اويانمير!»

«اويانمير داي، نئيله‌ييم!»

كيشي هيرسله پيلله‌كنلره آتـيلدي. آلاچيغا چيخدي، اوشاغين ايكي قولوندان توتوب قووزادي. اوشاق بير دووشان بالاسي كيمي الينده آسيلي قالدي. يوخولو- يوخولو ال- آياق آتير، «آنا، آناجان!»- دئيه قيشقيردي. كيشي آلاچيقدان اوشاغي آشاغي ائنديريب قادينين قاباغينا آتدي. اوشاق حيه‌طين توزلارينين ايچينده يئره سريلدي.

قادين اوشاغينا باخدي، باخدي:

«آللاه هئچ كيمين بالاسيني اؤزگه‌نين الينده قويماسين» – دئدي. تئز اوشاغي يئردن گؤتوروب باغرينا باسدي. اوشاغين گؤزلري يئكه- يئكه آچيليب، حئيرتله باخيردي. آپاريب سويوق سو ايله اوزونو يودو.

اؤزونه گلن اوشاق: «آنا» دئدي.

– جان!

– آغزيما قيرميزي بيبر سوخدون؟

بو واخت مصطفي‌آغانين ماشيني گلدي، ائولري‌نين قاباغيندا داياندي.

– عثمان …

عثمان قاچا- قاچا گئديب ماشينا ميندي. سئوينجدن دريسينه سيغيشمير، ماهني اوخويوردو.

آناسي مصطفي‌آغانين تارلاسيندا گونه‌موزد ايشله‌ين «زينب‌»ي بير كنارا چكيب دئدي: «قوربان اولوم، زينب باجي، عثماني گؤزله … اوشاق بير دري، بير سوموك‌دو …»

زينب:

– قورخما باجي- دئدي، «آرخايين اول».

تارلايا گئتديلر. هله گون چيخماييب … كومباينين دوزگون سيرالاديغي دسته‌لر شئهلي‌دير … اوت و ياش اكين اييي‌سي گلير … آتي آرابايا قوشوب، يوكله‌مه‌يه باشلاديلار. آرابايا ايكي آت يئرينه بير آت قوشوبلار …آتين جيلووونو عثمان چكير، آرابا دولان كيمي، تئز خرمن يئرينه آپارير….

آراباني يوكله‌ين‌لر عثمان‌لا باش- باشا قويورلار:

– نئجه‌دي عثمان؟

– ياشا عثمان!

عثمان سئوينير …

چوخ كئچمه‌دن قيپ- قيرميزي بير اود حالقاسي حاليندا گونش قارشيداكي داغلارين داليندان چيخدي … اكين يئريندن، دسته‌لردن، سامانلاردان ياواش- ياواش، اينجه، گؤزله گؤرونن بير بوخار قووزانير. گؤيده پارچا- پارچا آغ بولودلار دولانير.

عثمان خرمن‌له دسته‌چيلر آراسيندا گليب- گئدير. عثمان جانلي، ديپ- ديري‌دير. زينب هردن: «هه عثمانيم. آسلان عثمانيم …»- دئيه عثماني اوخشايير.

گون تپه‌يه دوغرو يوكسلدي … هر يئر ايشيق ايچينده بوغولوب، تورپاق‌داكي بوغدالار دا، بيچيلميش دسته‌لره وورولان گون ايشيغي ائله بيل آلوودور … ايشيق ساپ كيمي هر يئري ساريييب، مينلرله، يوز مينلرله ايشیق ساپي بير- بيرينه دولاشيب، سانكي گؤيده اوچورلار. بيچيني دسته‌له‌ينلرين اوزونو توز توتوب، اوزلردن تر سوزولور. هر طرفه اود ساچيليب، هر يئر يانماقدادير.

عثمان قاراليب، اوزو بيرآز داها اينجه‌ليب، يئكه گؤزلري قيسيليب … كؤينه‌ييندن ده تر فيشقيريب …

سحر واختينداكي جانلي‌ليق هاردا قاليب!؟ … ايندي عثمان يئرييه‎نده آياقلاري بير- بيرينه دولاشير. آز قاليب ييخيلا و آتين آياقلاري آلتيندا قالا … عثمان اؤزونو ساخلايير.

تورپاق دا قيزارميش دمير كيمي‌دير. عثمان هر دفه آياغيني يئره قوياندا، ايستي‌دن سيچرايير. بونا گؤره ده يئريمه‌يي قريبه بير حال آليب …

آرابايا يئتيشه‌نه‌جن دسته باغلايان قادين‌لار، آغيزلاري يوخاري، دسته‌لرين اوستونده، گونشين آلتيندا ياتيب يورغونلوق آليرلار.

عثمان دورمادان گؤيه باخير … بير پارچا بولود … بعضن بير چوخ بولود كؤلگه‌سي اوست‌لرينده بير آن قاليب كئچير… گؤزلر بولود كؤلگه‌سي‌نين دالينجادير …

گون تپه‌ده‌دير … اكين يئري چيتيردايير. شوملانميش، قيزمار تورپاق عثمانين آياقلاري‌نين آلتيندا … عثمان دورمادان هوپلانير.

عثمان جانا گليب، آلتدان يانير، اوست‌دن يانير. ائله بيل جيگرينه قيزارميش بير دمير سوخورلار …

زينب دسته‌لري آرابايا يوكله‌ينده دؤنوب عثمانا باخدي. گؤردو كي، عثمانين آياقلاري تير- تير تيتره‌يير.

«عثمان» دئدي، «عثمان، عثمانيم بئله پييادا گئديب- گلمه، گل سني آتين اوستونه مينديريم».

قووزادي، آتين اوستونه مينديردي. عثمان آتي سوردو. هله آياقلاري‌نين تيتره‌مه‌سي قورتارماميشدي. آت اوستونده گئتدي- گلدي. زينب اوزاقلاردا دسته باغلاييردي. آتدان دوشوب، زينبه طرف يئريدي.

زينب:

– نييه آتي بوراخدين عثمان؟ بيردن قاچار گئدر ها!

عثمان اونا ياخين‌لاشيئب اليندن توتدو:

«باخ»- دئدي، «زينب خالا، من بؤيوينده سنه قيزيلدان سيرغا آلاجاغام».

قاچا- قاچا آتين يانينا قاييتدي.

ايستي آدامي بوغور … هاوا دورغون‌دور. آتين اوستونده عثمانين آياقلاري آغريدي. آز قاليب يئره دوشسون… گؤزو هئچ بير يئري گؤرمور. عثمان آتي سورمور، آت اؤزو گئديب- گلير.

بير آزدان ناهار ايستيراحتي. قيزمار گونشين آلتيندا يئمك … قان كيمي ايليق سو. زينبين بوتون يالوارماسيناباخماياراق، عثمان آغزينا بير تيكه بئله چؤرك قويمادي. ائله هئي سو ايچدي … زينبين آغلي كسيب، عثمانين باشينا بير وئدره سو تؤكدو. اوشاق اوندان سونرا بيرآز اؤزونه گله بيلدي.

ايشه باشلاياندا زينب دئدي:

– عثمان، سن گئت اوتور بير يئرده. آتي بير آيريسي سورسون.

عثمان:«اولماز، زينب خالا»- دئدي، «من سوره‌جه‌يم، هئچ يورولماميشام».

آتي اليندن آلان كيمي عثمان اوتوروب هؤنكور- هؤنكور آغلاماغا باشلادي:

«من يورولماميشام، واللاه يورولماميشام!»

بير قوجا آرواد دئدي:

– مينديرين آتا بو گئده‌ني … قوي دوشوب آتين اياقلاري آلتيندا ازيلسين … ايت كوچويو!

عثمان:

– واللاه دوشمه‌رم، بيللاه دوشمه‌رم. آخي من يورولماميشام كي.

مينديرديلر. مينديرديلر آمما، اوچ دفه گئديب- گلندن سونرا عثمانين باشيئ گيجللنمه‌يه باشلادي … اؤزونو گوجله ساخلايير.

بيرآزدان، آتين اوستونده اوزاندي، آتين ياليني اللرينه دولادي. زينب وضعييتي باشا دوشوب، عثماني آتين اوستوندن ائنديردي. عثمان هوشدان گئتميشدي. آپاريب بير دسته‌نين اوستونده ياتيرتدي.

زينب: «بالا»- دئدي، «بالا، آخي نه‌قده‌ر عنادكارسان …»

سونرا زينب يئنه سو گتيريب، عثمانين باشينا تؤكدو. گونون قاباغيندا دايانيب عثماني اؤز كؤلگه‌سينده ساخلادي. عثمان بير موددتدن سونرا آييلدي. آخشام، ايش تعطيل اولاناجان، زينبين قويدوغو دسته‌نين اوستونده، بوم- بوش گؤزلرله ايشله‌ين‌لره باخدي. اوتانديغيندان باشيني قووزايا بيلميردي.

ايش قورتاراندا زينب عثمانين اليندن توتوب ماشينا مينديردي. اوشاق ائله بيل اريميشدي. زينب دئدي:

– عثمان بو گون سن چوخ ياخشي ايشله‌دين. مصطفي‌آغا موزدونو آرتيقلاماسي ايله وئره‌جك.

عثمان تعجّوب‌له سوروشدو: «دوغرودان وئره‌جك؟»

«سن چوخ ايشله‌دين».

عثمان سانكي تزه‌دن جانلاندي.

***

بوتون عايله ييغيشيب قاپي قاباغيندا يئمك يئييرلر … اوياندا آرابا، ارابايا باغلي آتلار. آتلار باشلاريني ياش اوتا سوخوب، خيشيرتي ايله، سانكي اوتو سومورورلار. اطرافي ياش اوت قوخوسو آليب …

قارانليق پرده- پرده ائنير. آتلارين بيرآز او طرفينده ده عثمان تارلادان گلديييندن بري تيكيليب دوروب. صبيرسيزليكله گؤزله‌يير، گؤزو يئمك يئيه‌نلرده‌دير. يئمك يئيه‌نلر عثماني گؤرمورلر.

عثمان گؤزله‌يير. آخيردا صبري توكه‌نيب اؤسكورور. هئچ كيم اؤسكورويو ائشيتمير. عثمان بير نئچه دفه ده اؤسكورور. عثمان اطرافينا باخير. يئردن بير آغاج گؤتوروب، گورولتويله سينديرير. يئمك يئيه‌نلر اهمييت وئرميرلر. سونرا عثمان سينديرديغي آغاج‌لا توزلاردا داييره‌لر، خط‌لر چكير. آغاجي وارگوجو يله تورپاغا سورتور. آغاجين تورپاغا قووّتله سورتولمه‌سيندن چيخان سسلر … عثمان ايسته‌يينه يئتيشمير. يئمك يئيه‌نلر دانيشيب گولورلر. عثمان هيرس‌لنير. دورمادان آغاجي تورپاغا سورتور. چكدييي داييره‌لري آياقلاري ايله پوزور. اغاجين اوجو تورپاقدا… عثمان قاچا- قاچا آغاجين اطرافيندا دولانير. سونرا يئمك يئيه‌نلري اونودوب، اؤز اويونو ايله مشغول اولور … چكير، چكير، پوزور.

بيردن بير سس … آغاج اليندن دوشدو. يئرينده دؤندو قالدي. قاچمالي‌دير؛ قاچا بيلمير.

مصطفي‌آغانين آروادي حئيرتله دئدي:

«واي عثمان‌دي بو! عثمان … گل عثمان!»

عثمان يئريندن ترپنمير.

«گل عثمان، اوتور چؤرك يي‌ء!»

عثمان ائله بيل ائشيتمه‌ييب، هئچ بير زاد دئمير.

«سني آنان گؤندريب؟»

عثمان باشي آشاغي‌دير، قووزامير باشيني.

«يوخسا زمي‌دن گلندن سونرا بلكه ائوه گئتمه‌ييب‌سن، دلي اوغلان؟ آنان نيگران اولار، سني آختارار».

ارينه طرف اييليب، بير شئي‌لر دئدي. سوفره اطرافينداكي‌لار گولدولر.

عثمان اورادان قاچماق ايسته‌يير. ايسته‌يير، آمما ائله بيل يئرينه ميخ‌لانيب.

مصطفي‌آغا: «هله بير منه باخين، عثمانين موزدونو وئرمه‌يي اونوتموشام»- دئدي. كيسه‌سيني چيخارديب عثمانا طرف بير ايييرمي بئش‌ليك اوزاتدي. عثمان تئز پولو قاپدي.

«ساغ اول»- دئيه قاچدي.

قاچا- قاچا ائوه گليب، آناسي‌نين قوجاغينا آتيلدي.

«آل! …»- دئدي.

آنا ايييرمي بئش‌لييي اوچ دفه باشي‌نين دؤوره‌سينه دولانديريب، سونرا دوداغينا طرف آپاردي.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *