توفان/ هند حيکايهسي
چئويرن:م. امين مؤيد[1]
معبد، شهر حؤومه‌سي‌نين لاپ اوجا يئرينده تيكيلميش ايدي. اوندان بئله اورادا دا ايلاهييت هئـيكلي، بوينونا قده‌ر سو ايچينده ايدي. سو هر يئري بوروموشدو. اورادا ياشايانلار قورو يئر آختارماغا گئـتميشديلر. هر ائوده كي، قايـيق وار ايدي، شئـي- شويلريني قوروماق اوچون بير كيمسه قايـيق‌دا قالميشدي. معبدين اوچ اوتاقلـي اوست مرتبه‌سينده آتميش يئددي اوشاق و اوچ يوز اللي آلتـي قاري، هابئله ايت‌لر، كئچي‌لر، تويوق- خوروزلار بير- بيرينه قاريشيب قايناشيرديلار.
«چنان پاريا» بير گئجه- گوندوز سودا قالميشدي. اونون قايـيغـي يوخ ايدي. اربابي اوچ گون بوندان قاباق جانـينـي گؤتوروب قاچميشدي. سويون ايلك دامجي‌لاري دامان كيمي تئز آغاج بوداق‌لاري ايله نارگيل يارپاق‌لارينـي بير- بيرينه چيتييه‌رك بير شيرواني آلتـي دوزه‌لتميشدير. او، قاسيرغانـين، تئزليكله يونگول‌لشمه‌يي اوميديله، ايكي گون بورادا كئچيندي. بورادا بئش سالخـيم نارگيل بير باغ دا يونجا وار ايدي. قورخوردو ائوي بوش گؤروب اونلاري آپارالار.
اينديسه شيرواني آلتـيندا سو ديزه قده‌ر يوخاري قالخميشدي. تاوانا ياپيشميش ايكي چرگه نارگيل يارپاق‌لارينـي داها سو باسميشدي «چنان» كومانـين ايچينده باغـيرسا دا آنجاق اونون سسيني ائشيدن يوخ ايدي. اونون وار- يوخو بويلو بير قادين، دؤرد كيچيك اوشاق، بير پيشيك، بير ده ايت ايدي. او ايناندي كي، اون ايكي ساعاتا كيمي سو تاوانا قالخاجاق. بو او دئمك‌دير اونلارين آخـيري چاتاجاقدير. اوچ گونون ايچينده ياغـيش كسمهميشدير.
او، كولش‌دن قايريلميش تاوانـين بير آزينـي دئشه‌رك بير باجا قايـيريب، اورادان باشينـي ائشييه اوزاديب، اويان- بويانا بويلاندي. بؤيوك بير قايـيق شيمالا ساري گئديردي. باجاراجاغـي قده‌ر اوجا سسله قايـيق‌چـي‌لاري سسله‌دي. بخت اونا يارديم اولدو. اونلار احوالاتـي باشا دوشوب كومايا ساري سوردولر. چنان، آروادينـي، اوشاق‌لارينـي، ايتي و پيشييي بير- بير باجادان ائشييه چكدي. اوشاق‌لار ديرماشيب قايـيغا مينه‌نده چنان بير قـيشقـيرتـي ائشيتدي: «آهاي چنان»- دئه بير كيمسه گون‌باتان طرفيندن اونو سسله‌ييردي. چنان، سسه ساري دؤندو. «كونچييان»ين سسي ايدي، او ائوين داميندا قـيشقـيريردي. چنان، چوخ تله‌سيك حيات يولداشينـي قايـيغا چاتديردي. پيشيك ده الوئريشلي فورصتده قايـيغا آتـيلدي.
كيمسه ايتين قئـيدينده دئـييلدي. او كومانـين گون‌باتان طرفينده شئـي- شوي‌لري آراياراق ايي چكيردي. قايـيق يولا دوشوب كومادان آرا آچدي. ايت عاييلهني گؤزلهدييي يئره قايـيديب گؤردو كي، قايـيق داها اوزاق‌لاشيب‌دير. سانكي قايـيق اوچوردو. تهلوكه‌ني حيس ائده‌رك هورمه‌يه باشلادي. ايت، تهلوكه‌يه اوغراميش بير اينسان كيمي اؤزوندن قريبه سس‌لر چـيخاريردي. آمما اونون سسيني ائشيده‌سي بير كيمسه يوخ ايدي. او دامين اوستونده دؤرد طرفه يويوروك ايي چكيب هوروردو. بير قورباغا کومادا، ايتين سسيني ائشيديب، قورخوب شاپپيلتـي ايله اؤزونو سويا آتدي. ايت قورخا- قورخا قورباغانـين آتـيلديغـي يئرده سويون ياريلديغـي نؤقطه‌سينه باخدي. او يئمك ايسته‌ييردي، اونا گؤره ده كومانـي دؤور ووروب نه‌سه آختاريردي. او ايي چكديكده بير قورباغا اونون بورنونا ايليشيب اؤزونو سويا آتدي. ايت وورنوخاركن آسقـيريب، اؤسگوردو. بير آياغـي ايله اؤزونو تميزله‌دي. بير داها ياغـيش ياغماغا باشلادي، ايت اؤز توك‌لري‌نين ايچينده بوزوشدو. بو زامان اونون صاحيبي «آسيالامپوز» دا ساغ- سالامات قايـيق‌دان ائندي.
گئجه ايدي، بير هوندور تيمساح آستا- آستا اوزه‌نده كومايا توخوندو. ايت وحشت‌له هوردو و قويروغو ساللاندي. آمما سانكي تيمساحين اونونلا ايشي يوخ ايدي. يازيق حئـيوان كومانـين لاپ اوجا يئرينده اوتوردو، قارانلـيق گؤيه باخـيب هوردو، اونون غملي هورمه‌سي اوزاق‌لاردا ائشيديليردي.
سس‌لرين مهربان تانري‌سي ناله‌نين سسيني باشقا ساحيل‌لره آپاردي. بير عيدده اونو ائشيديب و اولا بيلسين كي، ياواش‌جاسينا اؤزلريله دانـيشدي‌لار: «واي، بير يازيق ايتي دام‌دا قويوب اونو ترك ائـتديلر. لاپ روسواچـيلـيق‌دير». بلكه ده ايندي اونون صاحيبي قورولوق‌دا شام يئـييردي؛ بلكه ده يئمك يئـيه‌رك حئـيوانـي دا ياد ائله‌يير. ايتين اوزون اولاشمالاري ضعيف ناله‌يه چئوريلدي. كيمسه «رامايانا»دان بير نئچه بئـيت اوخويوردو. ايت او سسه قولاق شاخلاياراق بير مودت ساكيت داياندي. سونرا ائله بيل كي، اوره‌يي سينان كيمي اولوب سيزيلدادي قارانلـيق گئجه‌نين سوكوتوندا «رامايانا» ماهنـي‌سي هاوانـي دولدوردو. ايت يئنه قولاق‌لارينـي شاخلايـيب قولاق آسدي، حركت‌سيز داياندي. ماهنـي‌نـين شيرين لحني، داوام ائله‌ين سويوق يئل ايله قاريشيردي. باشقا بير سس يالنـيز يئل سسي ايدي. ايت حيس ائـتدي كي، يومشاق بورنو قـيزاريب شيشيب‌دير.
ايكيندي چاغـي ايكي كيشي بير كيچيك قايـيق‌دا اورادان كئچديلر. ايت هوروب اوميدله قويروغونو ترپتدي. چالـيشيردي، اؤزونون پيس وضعييتي‌ني مومكون قده‌ر اينسان باشا دوشه بيله‌جه‌يي يول‌لارلا بيلديرسين. سويون ايچينده دال آياق‌لاري‌نـين اوستونه قالخاراق قايـيغا آتـيلماق حالتي توتدو.
اونلارين بيري قـيشقـيردي: «باخ، اورادا بير ايت وار. او قويروغونو بوللاياراق، اؤزه‌ل بير سس چـيخارماقدا سانكي قدير بيلن‌ليك ائديب و شفقت ديله‌ييردي».
ايكينجي كيشي دئدي: «قوي اولسون». ايت گؤزلري ايله يالواريردي. ايكي دؤنه چالـيشدي قايـيغـين ايچينه آتـيلسين، آنجاق قايـيق گئـت‌به‌گئـت اوزاقلاشدي. ايت بير داها سيزيلتـي‌يا باشلادي؛ قايـيق‌چـي‌لارين بيري دؤنوب دالـي‌يا باخدي. او، اؤز يانلـيشينـي باشا دوشدو. سس قايـيق‌چـي سسي يوخ، بلكه ايتين اينسان ساياغـي ناله چكدييي ايدي. يورغون، نيياران سيزيلتـي كوله‌يين سسي اليه قاريشميش، سويوق دالغالار ايچينده بير داها ائشيديلدي.
قايـيق گؤزدن ايته‌نه قده‌ر اونا گؤز زيلله‌دي. سانكي دونيادان زهله‌سي گئدير و اوندان ويدالاشماق اوچون كومانـين لاپ اوجا يئرينه قالخدي. بلكه اؤز- اؤزونه دئـييرميش كي، بير داها اينسانـي سئومه‌يه‌جكدير. سويوق سودان يالايـيب ايچدي. باشي اوسته اوچان قوش‌لارا و سونرا دا دالغالارين اوزه‌رينده اوينايان بير ايلان بالـيغـينا باخدي. ايلان بالـيغـي «چنان» آچديغـي باجادان ايچري گيردي. ايت گؤز- قولاق‌دا ايدي. آجلـيق تحريكيندن و اؤلوم قورخوسونون تأثيريندن اوجادان هوردو. هامي او سسي باشا دوشه بيلردي. اونا گؤره كي، او سس بوتون دونيا آنلاديغـي بير ديلده ايدي.
توفان ايله ياغـيش يئنه ده باشلادي. دالغالارين اوغرايـيش نتيجه‌سينده تاوان داها داوامينـي الدن وئرميشدي. ايت يئنه ده اينسان سسي ائشيتدي: «ايت سسي هاردان گلير؟ اولمايا كومانـين يييه‌لري يوخدور؟» ايت، قوز آغاجي‌نـين ياخـين‌لـيغـيندا آغاجا باغلانميش بير قايـيق گؤردو. قايـيغـين ايچري‌سي موز، قاميش و نارگيل بوداغلاري ايله دولو ايدي.
ايت قايـيق‌چـي‌لارا ساري دؤنوب، هوره- هوره سويا ياخـين‌لاشدي، آداملارين بيري موز آغاجينا چاتدي. باشقا بيريسي تهلوكه‌ني آنديراراق دئدي: «گؤزله، ايت ائله بيل جوماجاقدير».
ايت جوموب آتـيلدي و كيشي الينده‌كي‌لري بوراخاراق سويا دوشدو. ايكينجي يولداشي‌نـين يارديمي‌ايله قايـيغا چاتـيب ميندي. ايت ده اوزه‌رك سودان چـيخدي. كوما باشينا چاتدي اوغرولار، بوتون موز سالخـيم‌لارينـي كسيب غارت ائـتديلر.
ايتين آجي هورمه‌سيني ائشيده‌رك دئديلر: «دايان سنه گؤستره‌ريك» سونرا قايـيغا خئـيلك كولش يـيغديلار. آخـيردا اونلارين بيري كومانـين دامينا ديرماشدي. ايتين نه گوجو وار ايدي ديشلريني اونون قـيچـينا باسيب و آغزي دولوسو اونون قـيچـي‌نـين اتيندن قوپارتدي. كيشي آغري‌دان قـيشقـيريب اؤزونو قايـيغا سالدي. باشقا بيريسي بئله گؤردوكده آغـير ضربه ائنديردي. ايت بير ناله سسي چـيخاريب، سونرا دا سسي كسيلدي. يارالانميش كيشي قايـيق‌دا اوزانـيب، اوجا سسله هاراي چكيردي. ايكينجي كيشي اوندان ايسته‌ييردي كي سسيني كسسين، يوخسا تانـينارلار. اوزون زامان ايت، اوزاقلاشان قايـيغا ساري هوردو.
داها گئجه ياري‌سي ايدي. دالغالاردا هرله‌نن هوندور بير اؤكوزون اؤلوسو كومانـين ياخـين‌لـيغـيندا ايليشيب داياندي. ايت، اؤكوزون اؤلوسونه ياخـين‌لاشاراق، اونا باخدي. آيريلـيب آشاغـي‌يا سورولدو. ايت اونا ساري داشلاندي. قويروغونو شاخلاياراق ديشلريني جمده‌يه باتـيردي و اونون بول اتيني چوخ لذّتله يئدي.
بيردن- بيره اؤكوزون جمده‌يي سو آلتـينا گئده‌رك ايت ده گؤزدن ايتدي. اوندان سونرا آنجاق توفانـين گورولتوسو، قورباغالارين قورولتوسو و بير ده چايـين اوزه‌رينده تؤره‌نن دالغالارين سسي ائشيديليردي. ايت ساكيت ايدي.
اونون، اوره‌ك‌سيخـيجي ناله‌لري، يانـيقلـي سيزيلتـي‌لاري داها كسيلميشدي. اپريييب شيشميش جمده‌ك‌لر چايـين دالغالاري ايله اوزو آشاغـي گئديرديلر. قارغالار آرخايـين‌لـيقلا اونلاري ديمديك‌له‌ييرديلر. كيمسه يوخ ايدي. اوغرولار مانئع‌سيز اولاراق راحاتجاسينا اؤز ايش‌لريني گؤروردولر.
بير آز سونرا كوما اوچوب داغـيلدي. اوجو- بوجاغـي گؤرونمه‌ين سودا هئچ بير شئـي گؤرسنميردي. ايت اؤلنه‌دك اؤز صاحابي‌نـين وار- يوخونو گؤزتله‌دي. ايندي ايسه او تيمساحلار ايختيياريندا ايدي و كوما ايسه اوچوب آرادان گئـتميشدير.
سو چكيلمك‌ده ايدي. چنان، اوزه- اوزه كومايا چاتدي. ايتين باشينا نه گلديييني بيلدي. نارگيل آغاجي‌نـين آلتـيندا دالغالانان سويون اوزه‌رينده بير ايتين اؤلوسو هرلنيردي. چنان بارماق‌لاري ايله ايتين اؤلوسونو چئويريب باخدي. ايتي گؤرن كيمي حئـيرت‌لندي. اونون قولاغـي قوپاريلميش دريسي سويولموشدو. رنگي چوخ چتين بللنيردي.