اؤن سؤز
اودلار اؤلکه‌سي آذربايجان، پارلاق و شانلي تاريخه، زنگين مدنيته و ايگيد خالقا ماليکدير. آذربایجان اؤز قوينوندا مينلرجه غئيرتلي و شجاعتلي اينسان بسله‌ييب، چوخلو دؤيوشلردن مظفر چيخيب، اونودولماز شرف لؤوحه‌لري ياراديبدير. بو پارلاق تاريخي کئچميش، ميللي وارليغيميزي دانان آلچاقلارين گؤزلرينه زهرلي تيکان کيمي‌دير. بو کئچميش خالقيميزين باشي اوجاليغي، دوشمانلارين‌ايسه آلچاقليغيني عکس ائتديرن جانلي تاريخدير. بابک‌لر، جاوانشيرلر، کوراوغلولار، نبي‌لر، قاچاق‌کرم‌لر، ستارخان‌لار، حيدرخان‌لار، نيگارلار، هجرلر، زينب‌پاشالار، سريه‌لر و …. بو يورددا، بو اودلار اؤلکه‌سينده بويا- باشا چاتيب، تاريخيميزده پارلاق اولدوزلارا چئوريليبلر. بو آذربايجان ايگيدلري شرفله اؤلمه‌يي، شرفسيز ياشاماغا اوستون توتوب و غدار دوشمانلارين قارشيسيندا اييلمه‌ييبلر.
آذربايجان موباريزه تاريخينين بير چوخ صحيفه‌لري اونون رشادتلي اوغول‌لارينين قهرمانليغي‌ايله قيزيللانيبسادا، بو يوردون قيزلاري‌دا اؤز آتا- بابالاري و قارداشلاري کيمي بو پارلاقليغين گونشلرينه چئوريليبلر. اونلار ايگيدليکله دؤيوشوب، جلادلارين اؤنونده آلچالماييبلار. شاهسئون قيزي ثومه‌رينلي “سريه” آذربايجانين قهرمانليق تاريخينين پارلاق اولدوزلارينداندير.
“سريه” اردبيل تابعه سیندن اولان “ثومه‌رين” ماحاليندا ياشاييب، اورادا‌ايسه 1324-25نجي ايللرده آذربايجاندا باش وئره‌ن ميللي آزادليق حرکاتي‌نين دؤيوشچوسو اولوب، ميللي نئهضتين قانا چکيلمه‌سيله، غدارجاسينا شاهين يئرلي نوکرلري واسيطه‌سيله اؤلدورولوبدور. سريه‌نين ياشاييشي، موباريزه‌سي و شرفله اؤلمه‌سي بيرداها “آصلانين ائرکک ديشيسي اولماز” سؤزونون فاکتيک ثوبوتو اولموشدور.
آذربايجان ميللي نهضتي‌نين شاه و استبداد قوشونونون توسطي‌ايله قانا چکيلمه‌سي تاريخين ان دهشتلي فاجعه‌لريندندير. اونلارين آذربايجاندا تؤکدوکلري قانلارين هر بير داملاسي شاهين يئرلي نوکر و سلطنت‌رئژيمي‌نين ننگ و آلچاقليق لکه‌سينه چئوريلدي.
شاه قوشونو آذربايجانين بوتون شهر و کندلرين قانا چکمک داواميندا، اردبيل منطقه‌سي‌نين موباريزلري و آزاديخواهلاري قارشيسينادا چيخیرلار. بو گونلرده “سريه” حيات يولداشي “علي” و موباريز يولداشلاري‌لا بيرليکده ثومه‌رين اطرافيندا شاه اوردوسو و اونون يئرلي نوکرلريله ووروشوردولار. اونلار قارشيدا دوران دوشماني اؤلدوررکن داغلارا دالي اوتوردولار. بورادا کند ماليکي نين سيلاحلي قولدور دسته‌سينه راست گليرلر. بئش گون آتيشما داوام ائدير. ثومه‌رين موباريزلري او جومله‌دن قهرمان سريه دوشمانين تکليف ائتديي “تسليم” سؤزونه باخماياراق، شجاعتله سون گولله‌يه قده‌ر ووروشا داوام وئريرلر. اونلارين گولله و ساير تجهيزاتلاري توکنمکده‌ايدير. کند ماليکي آلچاقليقلا بير حيله‌يه ال وورور. سريه و يولداشلارينين قارشيسينا قران گتيرير، اونا ال باسير، آند ايچير و “شرفله!” “سؤز!” وئرير کي سريه و يولداشلاري دؤيوشدن ال چکسه‌لر، آماندا اولاجاقلار. آمما بو شاه نوکري دؤيوشون داواميندا سريه‌ني توتوب، قرانا باسديغي اللريني اونون و بير سيرا ديگر موباريزلرين قانينا بويانديرير.
سريه اؤلدورولمه‌ميشدن اول، بارماغيني جلادلارين گؤزونون ايچينه سيلکه‌رک، “بو سيزين اوچون هنر دئييل. تاريخ عهد و پيمان پوزانلاري نيفرتله ياد ائده‌جکدير. آذربايجانين ايگيد اوغوللاري منيم قانيمي يئرده قويموياجاقلار.” دئيير.
سريه‌نين قهرمانليق داستاني معلوم سببلر اوزره ياييلماميش قالير، يالنيز بير ايکي کيچيک حجملي يازي “آزادليق يولونون موباريزلري” کيتابي و سون ايللرده بعضي اينترنت سايتلاريندا ياييلير.
سئوينجلي حالدير کي گؤرکملي خالق شاعريميز هاشم ترلان‌ين سون اثري، ايلک دفعه اولاراق سريه و اونون حيات و موباريزه‌سينه حصر ائديلميشدير. بو بؤيوک حجملي پوئتيک اثرده شاعر، آذربايجان خالقي‌نين آصلان قيزي ثومه‌رينلي سريه‌نين دؤيوشونو و شهادتيني بديعي اثر کيمي اوخوجولارينا تقديم ائتميشدير. اثرده بير نئچه پوئتيک لووحه‌نين تاماشاچيسي اولوروق. سريه‌نين موغانا گئده‌ن کوچ اوسته آنادان اولماسي، بويا باشا چاتيب علي آديندا ايگيد بير گنجله حيات قورماسي، بير فدايي کيمي ميللي نئهضته قوشولوب و آذربايجان دموکرات فيرقه‌سي سيرالاريندا دؤيوشمه‌سي و نهايت قولدورلارين خيانت اللري‌له اؤلدورولمه‌سي، اثري تشکيل ائده‌ن لؤوحه‌لردير. بو اثر بؤيوک حجملي اولدوغو اوچون مستقل کيتاب شکلينده چاپ اولماليدير. عزيز اوخوجولارا تقديم اولونان آشاغيداکي پارچالار، اثرين مختلف پوئتيک لوحه‌لريندن نمونه‌لر کيمي‌ وئريليبدير.

ائلدار موغانلي

سریه‌نین قهرمانلیق داستانی
هاشم ترلان

دان‌ سؤكولور، گونش‌ يانير باشيندا تاج‌،
شئح‌ چكيلير اوبالاردان‌ ياماج‌- ياماج‌ .
اوزاقلاردا آغ‌ شلمه‌لي‌ بوز داغلارين‌
زيروه‌سيندن‌ شئح چيله‌نير نارين‌- نارين‌.
گديكلرده‌ كاروان‌ يولو مين‌ آشيريم‌،
دره‌لرده‌ سولار جوشور شيريم‌-شيريم‌.
شلاله‌لر هاراي‌ ساليب‌ تؤكولدوكجه‌
سپه‌له‌نير قايالارا اينجه‌- اينجه‌.
زامان‌ گولور، گون‌ قيسالير پرده‌-پرده‌،
بولوت‌لاردا سئيره‌ چيخيب‌ زيروه‌لرده‌.
هر ايقليمين‌ اؤز رنگي‌ وار ائلدن‌- ائله‌، ‌
ياي‌ پاييزين‌ الين‌ سيخير گوله‌-گوله‌.
بوردا ائلات‌ قارتال‌لاري‌ آچير قاناد،
حؤكمون‌ سورور چادير-چادير، ائلات‌-ائلات‌.
“ائل‌سئون”‌لر دياري‌دير بو ائل‌، مكان‌،
آت‌ اويناديب‌، قيلينج‌ چاليب‌ زامان‌-زامان‌.
پاييز گليب‌ كؤچ‌ اوستو‌دور، گئدير تلاش‌،
آران‌ فيكري‌ كؤنوللرده‌ قالديريب‌ باش‌…..
×××××
داغلار آغ‌ اؤرپه‌يين‌ آتيب‌ باشيندان‌،
پاييز عطري‌ گلير هر قاريشيندان‌…..
باخ‌! سونسوز گؤيلره‌، ساي‌ اولدوزلاري‌،
ارن‌ قادينلاري‌، ارن‌ قيزلاري‌!
امه‌يه‌، زحمته‌ ايمانلاريلا،
اوست‌- اوسته‌ گئيديي‌ تومانلاريلا،
دره‌دن‌ تپه‌يه‌- تپه‌دن‌ دوزه‌،
گئجه‌دن‌ آچيلان‌ ياشيل‌ گوندوزه‌،
تلسسن گؤررسن‌ اونلاري‌ هر آن،‌
فخر ائيلر باخديقجا دوغما ساوالان‌…..

آلاچيق آچيلير،چكيلير يوكه‌،
اوشاقلار ايش‌ گؤرور اؤزوندن‌ يئكه‌.
هر ياندا هاي‌- هاراي‌ قوپور، سس‌ گلير،
مرفشلر باغلانير، آتا يوكله‌نير…..

گونش‌ ساوالانين‌ باشيندا بير تاج‌،
گولوردو ائللره‌ وئرديجه‌ خراج‌.
بوش‌ قالان‌ آرخاجين‌ كؤنلو دارالدي‌،
گؤزلري‌ يول‌ گئده‌ن‌ كارواندا قالدي‌.
هله‌ليك‌، هله‌ليك‌ اي‌ اوجا داغلار!
يئنه‌ده‌ بو ائللر سيزي‌ قوجاقلار…..

يهرين‌ قاشيندان‌، آتين‌ ياليندان‌-
ياپيشان‌ قادينلار بويلانير گونه‌.
داغلاردا بوي‌ آتان‌، آراندا گولن‌
خيردا اوشاقلاري‌ آليب‌ تركينه‌.

چوبان‌ نئي‌ سسي‌نين‌ لذتين‌ دادير،
سورونو هايلايير اؤروشدن‌ قاباق‌.
موغانين‌، آرانين‌ گؤزو يولدادير،
اوره‌يي‌ چيرپينير گؤروشدن‌ قاباق‌……

گونش‌ تئللريني‌ دارادي‌ گئتدي‌،
دومانليق‌ قانادين‌ آچدي‌ يوللارا.
ائله‌ بيل‌ گوندوزون‌ نورون‌ اريتدي‌،
سانكي‌ آل‌ گونشي‌ چكديلر دارا.

قورشاغين‌ ساللادي‌ دومان‌ بو آندا،
گؤيلر گورولدادي‌، كاروان‌ داياندي‌.
گؤيدن‌ نوغول‌- نوغول‌ دولو ياغاندا،
اوبالار گوموشو رنگه‌ بوياندي‌ .

بولوتلار چكيلدي‌، نه‌ دومان‌، نه‌ چن‌،
يئنه‌ده‌ آل‌ گونش‌ بويلاندي‌ دوم‌- دوز.
بير قادين‌ آت‌ اوسته‌ باغيردي‌ درددن‌،
نورلو گؤزلرينده‌ قارالدي‌ گوندوز.

ناله‌نين‌ سسيندن‌ قوجا بير قاري‌،
بيلنده‌ بو دردين‌ نه‌ اولدوغونو.
يادينا سالديقجا او دؤورانلاري‌،
اؤزونون‌ آت‌ اوسته‌ دوغولدوغونو.

ائنديريب‌ بوز آتين‌ اوستوندن‌ يئره‌
گليني‌ دؤره‌يه‌ آلدي‌ قادينلار.
گلدي‌ ائل‌ ماماسي‌، باخدي‌ گؤيلره‌
عؤمرونده‌ تجروبه‌، كؤنلونده‌ ايلقار.

قوجالي‌، جاوانلي‌ اؤتن‌ بو كاروان‌،
ائلاتي‌ اوخشايان‌ دره‌، داغ‌، تپه‌.
گؤزلرده‌ بير سووال‌، قيزدير يا اوغلان‌؟
دونيايا گؤز آچان‌ بو نازلي‌ كؤرپه‌.

اؤتور دقيقه‌لر، اؤتور لحظه‌لر،
باخيشلار بويلانير يانان‌ گون‌شه‌.
درده‌ بورونسه‌ده‌ گلين‌ بير ته‌هر،
هامينين‌ صبيري‌ دايانيب‌ عرشه‌.

دوغومون‌ سون‌ چاغي‌…كورپه‌ سسيندن‌
سئحيرلي‌ لحظه‌لر دؤندو سئوينجه‌.
داغلارا سس‌ سالان‌ گور نفسيندن‌،
سينه‌سي‌ دالغالي‌، گؤركمي‌ اينجه‌.

آناسي‌ كؤرپه‌يه‌ باخدي‌ بو آندا،
نارين‌ گولوشلرين‌ ائتدي‌ هدييه‌.
ازلدن‌ ايلقاري‌ واردي‌ دوغاندا
قيز اولسا آديني‌ قويسون‌ “سريه”‌.

سريه‌ چاغريلدي‌، او گوندن‌ بو قيز،
هامي‌ قانادلانيب،‌ آز قالير اوچا.
كيم‌ بيلدي‌ او زامان‌ قوجا دونياميز،
بير ايگيد دوغوبدور اؤزوندن‌ اوجا……

نه‌ بيلسين‌ تورپاغا شيمشك‌ چاخاجاق‌
آتديغي‌ گولله‌نين‌ هر ايشيغيندا.
نه‌ بيلسين‌ سنگرلر سوساجاق‌ آنجاق‌،
شاهسئون قيزينين‌ ياراشيغيندا…..

بير عؤمور دولايي‌ يوللاردان‌ كئچيب‌،
روزگاري‌ درك‌ ائديب‌، قلبي‌ دؤيوندو.
قيزلار بولاغي‌نين‌ سويوندان‌ ايچيب‌،
سئوداسي‌ اوياندي‌، چينارا دؤندو……….

“تومروس”دان‌ نيفرتي‌، سئوداني‌ ائلدن‌،
غئيرتي‌ بابكدن‌، تورپاقدان‌ گوجو-
آلدي‌، فخر ائيله‌دي‌ مين‌ بير كؤنولدن‌
آتيلدي‌ مئيدانا، سئومه‌دي‌ كونجو……

اؤزونه‌ گووه‌نن‌، داغا بوي‌ دئيه‌ن‌،
ائلچيلر قاپيدان‌ قووولدو‌ بير- بير.
سريه‌دن‌ اؤته‌ري‌ قلبي‌ گؤينه‌ين‌
گلنه‌ يوخ‌! دئدي‌، اولمادي‌ تدبير.

نهايت‌ سريه‌نين‌ اوره‌يي‌ جوشدو،
ايگيد بير اوغلاندان‌ كئچه‌ بيلمه‌دي‌.
گؤزلر بير- بيرينه‌ باخدي‌ قوووشدو‌،
“علي”‌دن‌ آيريسين‌ سئچه‌ بيلمه‌دي‌.

بير ساراي‌ چكديلر مرمردن‌ داشي‌،
كؤنولدن‌- كؤنوله‌ يوللار گؤروندو.
چاليندي‌ ايلقارين‌ ابدي‌ مارشي‌،
آرزولار يام‌- ياشيل‌ دونا بوروندو.

ايكي‌ داغ‌، ايكي‌ يار، ايكي‌ همكؤنول‌،
حياتين‌ عئيبه‌جر درينليكلري‌.
قايدادير بير گوله‌ اوخشاياندا گول‌،
آچيلار باغبانين‌ آيدين‌ سحري‌…….

نهايت‌ دولاندي‌ نئچه‌ قيش‌، باهار،
آخي‌ بو ائل‌، اوبا بيزه‌ وطندي‌.
چيخدي‌ دان‌ اولدوزو،‌ اريدي‌ بوزلار،
انتظار گؤزلرين‌ صبري‌ توكندي‌.

وطنه‌ گووه‌نن‌، ائله‌ اركؤيون‌-
اولانلار يئل‌ اولدو، سئل‌ اولدو آخدي‌.
اينسانلار تورپاغين‌، اولدوزلار گؤيون‌،
شفقلر ظولمتين‌ گؤزونه‌ چاخدي‌.

ايناملا چاغلادي‌، سانجيلدي‌ اوخ‌ تك‌
فيرقه‌نين‌ تملي‌ اركين‌ قاشيندا.
اونون‌ قدرتينه‌ اويانمادي‌ شك‌،
بو ائلين‌ ،تورپاغين‌ هر بير داشيندا…..

قاپيسي‌ آچيلدي‌ غئيرتيميزدن‌
زامانين‌ حؤكمي‌له‌ ميللي‌ مجليسين‌.
صداسي‌ سسلندي‌ قدرتيميزدن‌
ميللت‌ وكيلينه‌ وئريلن‌ سسين‌……..

فيرقه‌ميز وطنين‌ توتوب‌ اليندن‌،
دئدي‌: سني‌ دئييب‌ گلميشم‌ آنا.
گلميشم او توپوق‌ ووران‌ ديليندن‌،
بير شؤهرت‌ يارادام‌ آذربايجانا.

21 آذر، او شانلي‌ گونده‌
ديليميز ديل‌ اولدو آچاندا يئلكن‌.
آنادان‌ دوغولان‌ هر كؤرپه‌نين‌‌ده‌
پاسپورتو توركوجه‌ يازيلدي‌ ائركن‌.

كيتابلار ديليمجه‌ درج‌ اولدو مين‌- مين‌،
معصوم‌ دورنالارين‌ گزدي‌ تئلينده‌.
ابتدايي‌، اورتا، عالي‌ مكتبين‌
اساسي‌ قويولدو اؤز تملينده‌…….

تبريز كوچه‌لري‌ نورلو، چيراقلي‌،
گؤيون‌ اولدوزلاري‌ سانجيليب‌ يئره‌.
ايگيد فدائيلر نغمه‌ دوداقلي‌،
بويلانيب‌ صاباحكي‌ آيدين‌ سحره‌.

اورميه‌، ماراغا، اردبيل‌، ساراب‌،
ميللي‌ حوكومتين‌ اؤن‌ سيراسيندا.
دربارين‌ قالمادي‌ اوره‌يينده‌ تاب‌،
يئنه‌ نوحه‌لندي‌ ماتم‌ ياسيندا.

سريه ‌بو دؤوراني‌ بئله‌ گؤرونجه‌،
فيرقه‌نين‌ بويونا هؤردو چلنگي‌.
فدائي‌ آدلاندي‌ هاميدان‌ اؤنجه‌،
بئلينده‌ پاترونو، الده‌ توفنگي‌.

شررين‌ قاناديني‌ كؤكوندن‌ قيريب‌،
دوردو كئشيگينده‌ ائلين‌، اوبانين‌.
قارلي‌ گئجه‌لرده‌ اوجاق‌ يانديريب‌،
نبضي‌ اللرينده‌ اؤتن‌ هر آنين‌.

اؤرپه‌يي‌ باشيندا، قاتار بئلينده‌
سنگره‌ ياتاندا نر اوغلو، نردي‌.
گؤزو دورنالارين‌ ايپك‌ تئلينده‌،
باخيشي‌ يادلارين‌ باغرين‌ د‌لردي‌.

سؤزونه‌، امرينه‌ ائدردي‌ تمكين‌
فدائيلر اونا مين‌ ائحتراملا.
دوشمانا‌ توكنمز اوره‌يينه‌ كين‌،
خالقيني‌ سئوردي‌ مين‌ بير ايناملا.

قارا بولوتلارين‌ قانادي‌ سيندي‌،
سحر نسيمي‌نين‌ ايلك‌ باهاريندا.
سريه‌‌ده‌ زيروه‌لي‌ داغا سيغيندي‌
21 آذرين‌ قانادلاريندا.

فدائيلر آتلي‌، سريه‌ ائننده‌،
امر ائتدي‌: حركت‌! توزلاندي‌ يوللار.
بير يول‌ آيريجيندا ساغا دؤننده‌،
مئشه‌نين‌ ايچينده‌ ترپندي‌ كوللار.

سريه‌نين‌ توفنگي‌ ديللندي‌ بيردن‌،
فدائيلر كسدي‌ بندي‌، بره‌ني‌.
داغلارا ياييلان‌ بو سس‌- سميردن‌،
گولله‌لر بورودو‌ داغي‌، دره‌ني‌.

دوشمانلار آغ‌ يايليق‌ توتوب‌ الينده‌:
– سيز آللاه‌، رحم‌ ائدين‌،گولله‌ آتمايين‌!
بيز تسليم‌ اولوروق، ‌دئييب‌ ديلينده‌
– بيزلري‌ اؤلدوروب‌، قانا باتمايين‌.

فدائي‌ اؤنملي‌، فدائي‌ اؤتگم‌،
وطنين‌، فيرقه‌نين‌ علاجي‌ اوندا.
ظولمون‌ آتشينده‌ ياناندا اؤلكم‌،
بابكين‌ بايراغي‌، قلينجي‌ اوندا.

بو يوردون‌ دالغالي‌ گؤي‌ دنيزينده‌،
ماوي‌ گؤزلرينده‌ اوزدو سريه‌.
صاباحكي‌ باهارين‌ قاليب‌ ايزينده‌،
اوغروندا مؤحنته‌ دؤزدو سريه‌.

دئدي‌: من‌ بابكين‌ قيزييام‌ البت‌،
اونون‌ آخان‌ قاني‌، آلين‌ تريمدير.
اليمله‌ قوردوغوم‌ ميللي‌ حوكومت‌،
وطنيم‌، تورپاغيم‌، اؤز سنگريمدير…..
* * * *
دربار يئنه‌ جولان‌ وئردي‌ قانادينا،
قوشون‌ چكدي‌،آت‌ اويناتدي‌ جوما-جوما.
حيله‌سيندن‌ چاتماق‌ اوچون‌ مورادينا،
طاعون‌ كيمي‌ سپه‌لندي‌ شن‌ يوردوما.

يئنه‌ دهشت‌، يئنه‌فرياد، يئنه‌ده‌ قان‌،
سانكي‌ گؤيون‌ قوزغونلاري‌ يئره‌ ائندي‌.
هر فدائي‌ گلديم‌ دئدي‌: آذربايجان‌!
سنسيز بيزه‌ جان‌ نه‌ لازيم‌ وطن‌، ايندي‌ !

بير- بيرينه‌ قارشي‌ دوردو خئييرله‌- شر،
ظولمت‌ چكدي‌ قلينجيني‌ آل‌ گوندوزه‌.
ياراقلاندي‌، داراقلاندي‌ فدائيلر،
دؤيوشلرده‌ قان‌ گؤلونده‌ اوزه‌-اوزه‌.

بيزيم‌ سريه‌ شاهسئونين ارن‌ قيزي‌،
كناريندا سئوگيليسي‌، جان‌ سيرداشي‌.
تورپاغيما جانين‌ هديه‌ وئرن‌ قيزي‌،
توفنگلرين‌ توشلاديلار يادا قارشي‌.

يئنه‌ گئيدي‌ غم‌ لباسين‌ آذربايجان‌،
دومان‌ آلدي‌ اردبيلين‌ داغين‌- داشين‌.
ثومه‌رينين‌ گؤزلرينده‌ نم‌، هيجان‌،
ساوالان‌‌دا كدرلي‌دير، چاتيب‌ قاشين‌.

سريه‌ دئدي‌: من‌ بابكين‌ نر قيزييام‌،
فرعونلارين‌ ايمضاسيلا‌ يوخدور آرام‌.
فدائييم‌، فيرقه‌ميزين‌ اولدوزويام‌،
جانيم‌ گئده‌ من‌ دوشمانلا‌ باريشمارام‌.

سنگر قوردو ثومه‌رينده‌ سريه‌ او گون‌،
عؤمور دوستو اؤز قهرمان‌ اري‌ ايله‌.
بو اوغورسوز زمانه‌دن‌ قلبي‌ كوسگون‌،
اود ساچيردي‌ توفنگينين‌ قه‌هري‌له‌.

اوز- اوزه‌دير اولوم‌، اؤلوم‌، ايكي‌ سنگر،
قورشونلارين‌ اؤلوم‌ ساچان‌ نريلتيسي‌.
اوياناندا سرت‌ قايالار ديزه‌ چؤكر،
فدائينين‌ اوره‌يينده‌ وطن‌ حيسسي‌.

ايكي‌ كؤنول‌ ساريلميشدير توفنگينه‌،
هر سنگرده‌ دوشمانلارين‌ سايي‌ قات‌- قات‌.
سريه ‌باخدي‌، غضبيندن‌ دولدو كينه‌،
دئدي‌: يوخسا اويونجاقدير بو كائينات‌.

بير سس‌ ‌گلدي‌ اؤن‌ جبهه‌دن‌: چؤكور آخشام-‌
تسليم‌ اولون‌! عؤمرونوزو وئرين‌ نجات‌.
سريه‌ دئدي‌: من‌ ائللردن‌ يارانميشام‌،
اؤلوم‌ نه‌دير؟ اودا منه‌ باشقا حيات‌.

دؤيوش‌ گئدير، سنگر بويو قيل و قال‌دير،
گولله‌ سسي‌ داغا، داشا سالير هاراي‌.
دؤيوش‌ گئدير…سانكي‌ بوتون‌ جاهان‌ لال‌دير
توفنگلرين‌ سسينده‌كي‌ سسدن‌ ساواي‌.

دوشمان‌ باخيب‌ غضبلندي‌ حئيرتيندن‌،
هوجوم‌ ائتدي‌ ياماج‌-ياماج‌، دره‌- دره‌.
سريه‌ گولدو، آجي‌-آجي‌ نيفرتيندن،‌
نعره‌ چكدي‌ شيغيديقجا هر سنگره‌.

سريه‌ خيال‌ عالمينده‌،كؤنلونده‌ ياس‌،
سون‌ گولله‌لر داراغيندا مسلسلين‌.
دئيير:داها سون‌ نوقطه‌دير…ماجال‌ قالماز،
سيلاحينين‌ چاخماغينا وورسا الين‌.

هله‌ دؤيوش‌ آلوو ساچير ثومه‌رينده‌،
خئيرين‌ گؤزو كؤلگه‌لندي‌، شر اوياندي‌.
بو آن‌ سريه‌ گؤردو دوشمان‌ سنگرينده‌،
آغ‌ يايليقدان‌ صولح‌ بايراغي‌ دالغالاندي‌.

ايكي‌ نفر نزاكتله‌، آرام‌-آرام‌،
اللرينده‌ مقدس‌ بير قران‌ گلير،
باخيشلاري‌ ظاهر دولو مين‌ ائحترام‌،
گؤزلرينده‌ مين‌ بير اينام‌، ايمان‌ گلير.

سريه‌ دالغين‌…خيالدادير، مين‌ گوماندا:
– بو دبدبه‌، بو طنطنه‌ ندن‌ بئله‌.
اونلار آخي‌ نه‌ بيلسين‌كي‌ بيز بو آندا
بير گولله‌ميز يوخدور بيزيم‌ بوندان‌ بئله‌.

اونلار دئيير: تسليم‌ اولون‌! بيله‌- بيله‌،
آمانداسيز، ال‌ باسيريق‌ قرانا بيز.
يوخسا صاباح‌ قوشون‌ گلسه‌ اردبيله‌
دار باشيندان‌ آسيلاجاق‌ هر تيكه‌نيز.

تسليم‌ سؤزو قانادلاندي‌، هاوالانيب‌ ،
قوچ‌ سريه‌نين‌ گؤزلرينده‌ قه‌هر اولدو.
ياد اولدوغو بير كلمه‌دن‌ قلبي‌ يانيب‌،
آرزولاري‌ اؤز كامينا زه‌هر اولدو.

جرئت‌ ائديب‌ سنگريندن‌ بويلانمايان‌،
قوزغون‌ اولوب‌ هارين‌- هارين‌ قوندو يئره‌.
سؤزون‌ داندي‌، دوشمان پوزدو عهد و پيمان‌،
گونش‌ باتدي‌ اوبا- اوبا، دره‌- دره‌.

ال‌ باسديغي‌،آند ايچدييي‌ قران‌ يئنه‌
هاوالاندي‌،كور ويجدانلار لكه‌لندي‌.
سريه‌ باخدي‌ قولونداكي‌ زنجيرينه‌،
غضب‌ دولو گؤزلريندن‌ نور الندي‌.

دئدي‌: سيز اي‌ داشا چاخان‌ اؤز ايلقارين‌
سانمايين كي‌ عملينيز اولدو هونر.
تاريخ‌ صاباح‌ عهد و پيمان‌ پوزانلاري‌،
نيفرت‌‌ايله‌ ياد ائده‌جك‌ هر گون‌ سحر.

شاهيد اولسون‌ باشيمداكي‌ بو آغ‌ لئچك-‌
هونريمه‌، دؤيوشومله‌ اولدوز تانيش‌.
اؤلسم‌، قانيم‌ بو تورپاغدا گؤيه‌ره‌جك‌،
سريه‌لر بوي‌ آتاجاق‌ قاريش‌- قاريش‌.

گؤيه‌ چيخساز، يئره‌ ائنسز، بيلين‌ صاباح‌،
بو دونياني‌ تيتره‌ده‌جك‌ آخان‌ قانيم‌.
حاق‌ ايسته‌ين‌ كؤنوللرده‌ نه‌دير گوناه‌،
اؤز خالقيما شؤهرت‌ اولار آديم‌، سانيم‌.

بو يانديران‌، ياخان‌ سؤزلر، قلينج‌ اولدو
سانجيلاندا قانسيزلارين‌ دار گؤزونه‌.
آج‌ گولله‌لر سوزه‌- سوزه‌ ساچين‌ يولدو،
ظولمت‌ چؤكدو سريه‌نين‌ گوندوزونه‌.

سريه‌ سؤندو، نغمه‌لري‌ دوداغيندا،
گونش‌ باتدي‌، كؤلگه‌ قوندو دان‌ يئرينه‌.
ائليم‌ دئدي‌، اوبام‌ دئدي‌، ساغليغيندا،
اؤلنده‌ده‌‌ بزك‌ اولدو سنگرينه‌…..

غئيرتينه‌ سيغيشمايان‌ بوتون‌ جاهان‌،
بابكيمين‌ ايگيد قيزي‌ سريه‌ هاني‌؟
اويان‌ سريه‌! دور آياغا مزاريندان‌،
قاتيل‌لرين‌ ترك‌ ائيله‌ييب‌ بو دونياني‌.

دوغولاندا آت‌ اوستونده‌ دئدين‌ :گره‌ك‌
توفنگيمله‌ سالام‌ وئرم‌ آل‌ گوندوزه‌.
ايندي‌ ائللر چيچك‌ سپير اتك‌- اتك‌
ثومه‌رينده‌ سن‌ ياتديغين‌ او سنگره‌…..

سن‌ ديريسن‌، اوره‌يينده‌ يانار اوجاق‌،
شعله‌سيله‌ سئير ائتديگين‌ بودونياني‌،
بو داستانلا اوزون‌ ايللر ياشاداجاق‌،
وطنينده‌ ترلان‌ سني‌، سن‌ ترلاني‌.

3 پاسخ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4