صولحون دونیاسی‌دیر بیزیم دونیامیز
حسین شهرک

صولحون دونیاسی‌دیر بیزیم دونیامیز
سئوگی بویاسی‌دیر بیزیم دونیامیز

بیرلشیب، آیریلیب گئدیب- گلمه‌یین
اؤیره‌نیب، اؤیره‌دیب گؤروب- بیلمه‌یین
کوسوب، باریشماغین دئییب- گولمه‌یین
قانون قایداسی‌دیر بیزیم دونیامیز
صولحون دونیاسی‌دیرر بیزیم دونیامیز

ییغینجاقلار اوردا سازلی، سؤزلودور
انسانلار خوش باخیش، گولر اوزلودور
گؤزلری ماوی‌دیر، آی- اولدوزلودور
آنا لایلاسی‌دیر بیزیم دونیامیز
صولحون دونیاسی‌دیرر بیزیم دونیامیز

کینه، عداوته اوردا میدان یوخ
کؤنولسوز، دویغوسوز هئچ بیر انسان یوخ
شیطنت اولسادا اوردا شیطان یوخ
رحمت دریاسی‌دیر بیزیم دونیامیز
صولحون دونیاسی‌دیر بیزیم دونیامیز

بولاغی، استعداد لیاقت‌لرین
خوش سؤزون، نغمه‌نین، خوش عادتلرین
هله‌لیک صداقت، ظرافت‌لرین
مهمانسراسی‌دیر بیزیم دونیامیز
صولحون دونیاسی‌دیر بیزیم دونیامیز

انعکاس یئریدی هیجانلارین
یاشلی اوشاقلارین، نوجوانلارین
بوتون مکتب‌لرین، آرمانلارین
آنا- آتاسی‌دیر بیزیم دونیامیز
صولحون دونیاسی‌دیر بیزیم دونیامیز

هئی- هئیی، های- هایی چؤلون، چوبانین
قیشلاغی، یایلاغی ائلین، اوبانین
آغ ساققال، آغ بیرچک آنا- بابانین
خئیر- دعاسی‌دیر بیزیم دونیامیز
صولحون دونیاسی‌دیر بیزیم دونیامیز

ایپک بولودلارلا گؤیلره اوچان
خیال‌لا گومان‌لا قول- قاناد آچان
سرحدلری پوزان، مرزلری کئچن
توراج، دورناسی‌دیر بیزیم دونیامیز
صولحون دونیاسی‌دیر بیزیم دونیامیز

بیزیک حرارتی ایستی قوجاغین
آختارین صفانین بیزده سوراغین
بشر آیین- شایین یاشایان باغین
قیزیل آلماسی‌دیر بیزیم دونیامیز
صولحون دونیاسی‌دیر بیزیم دونیامیز