غزه
میرجمال حسینی (اینجیک)
هاوادان قان قوخوسو
یئردن ناله سسی گلیر
و هر تین‌ده تیتره‌ییر اؤلومجول هیچقیرتیلار
جلاد قلینجینا چئوریلمیش
موسی‌نین عصاسی
فرعون هرمینه چؤنموش ب ام ت
خوش مراملی انسانلارا چئوریلمیش
کؤلگه‌سیندن شوبهه‌له‌نن ایتگینلر
قاتیللره نیفرتیمی قیناییرلار !
مسلمانام – دئیه ظولمو اودمالییام سؤیله‌ییر
– معاصیر گؤرونتو دویغوسوندا چوروینلر.
و چیخان جانلار
هله ده هانسی گوناهیم وار دییه ! دیره‌نیرلر اوفوقلارا .
وجدانلاری تیتره‌دن هیچقیرتیندایام غزه
یالتاقلاری قینایان – ظالیملره قارشی نیفرتم بوگون
تانریا غبضبله‌نیرم بیر عصیانکار وجدان کیمی
قانلی کفنلرینده هوپوش مظلومیتنه آغلاییرام
کؤرپه‌سینی اوخشایان آنایام بوگون
بالاسینین قوپموش آیاغین
باغریندا سیخان آتایام
سئوگی‌نین جنازه‌سی اوسته یولونان ساچام
من بوگون عصیانام غزه
اونوداجاغام بوتون سوسموش وجدانلاری
سنه یاس ساخلایاجاغام .
موغان ۱۳۹۳/۵/۱
یک پاسخ
ساغ اول یورت داشیم همشهریم