منی داریخدیران
یعقوب نامی

منی داریخدیران هیجران دئییل کی
اؤزومو اؤزومسوز حیسس ائله‌مک‌دیر
بئله‌جه نفه‌سین گلیب گئتمه‌سی
حیات‌سیز دیریلیک یالنیز دئمک‌دیر

داها اؤزومه‌ده جاواب تاپمیرام
اوزانیب اللریم قیسالیب دیلیم
بئله‌جه فیرلانسا دونیا باشیما
گؤزلریم آخاجاق هارا نه بیلیم

منی سارسیدانماز هئچ نه دئینده
اؤزومون اؤزومه گولماغیم گلیر
سونرادا اؤزومه گولومسه‌یه‌رک
بولود تک یاغیشا دولماغیم گلیر

ایندی سارسیدیجی اؤزوم اولموشام
قارانلیق گئجه‌ده،چیراغسیز یولدا
ائله قورخورام کی گله بیر زامان
صاباح‌سیز یاشایام بایاغسیز یولدا