بوگون یکشنبه 29 فروردین 1400 ساعات 15:47
ایشیق 1
آذربایجان معلم‌لری و تحصیل مساله‌سی
ایشیق 2

آذربایجان قفه‌خانالاری

ایشیق 3

آذربایجان و مهاجرت مساله‌سی

ایشیق 4
آذربایجان توی‌لاری

fariba mortazayiقیسا شعرلر(5)
فریبا مرتضایی

 (1)
بؤیوک سئوگی‌لر
کیچیک ائولرده یاشانار؛
گول باخیشلار
تورپاقلی آستانالارا تیکیلر؛
آددیملارینا قوربان اولوم
گل گوروشک!
ایکی اوتاق بیر دهلیز یئتر،
گؤی‌ده‌لن ده نه گزیرسن؟!
(2)
آشکارلار آجی،
گیزلین‌لر شیرین اولور؛
سن
گلینجه گیزلینجه
آغزیمین دادی ده‌ییشیر؛
آدین دیلیمین اوجوندا شیرینله‌شیر.
 (3)
اوشاقلیغیمدا
بیله‌ییمین اوستونو دیشلردیم
پوز وئرم بیر ساعات اوچون!
جانیم هئچ اینجیمزدی؛
بو گونلر
باشیمی آپاران،
بیله‌ییمی قوپاران،
جانیمی آجیدان،
عؤمرومو فیرلادیب
اؤلومون اتگینه آتان زاماندیر.
(4)
سولغون گئدیرم،
سن بیر گول!
قورخما،
سنی اَله
سنی ائله
سنی بئله
بوراخمارام؛
گل آیاقلاریم اوسته!
اؤلوم آیاق اوسته گؤزلدیر…
(5)
دئدیلر
سئوه‌نین بوینوزو اولماز؛
من سئوه- سئوه بوینوز چیخارتدیم ..
(6)
کیپریک‌لریم یاناغیمی دئشیر؛
سالخیم -سالخیم آغلاییرام؛
گئت دئمیشم؛ نئیله‌ییم،
نئیله‌ییم سنسیز گولوم؟!
چییین‌لرینده یوخ
داشیر گئدیر بوش یئره !
(7)
دویغولاریمی تومارلا!
خیالیمین بویوندان کئچ!
عرضیم بو قده‌ر…
(8)
گؤزلریمین پرده‌سی
باشینداکی یایلیقدان‌دیر؛
ساچینین بیر تئلینیه باخماق اوچون
ایپک یولون توتموشام.
(9)
حیات
گؤزه‌ل سازدیر؛
بیزه فنا چالدیلار،
خوش اوینادیق.
(10)
دونیانین سؤزون توتوب،
منه وئردییین سؤزو اونوتدون؛
منیم‌ده سؤزوم وار بو گون،
سؤزلویم گولوم !

 

7 پاسخ

  1. تبریکلر حؤرمتلی خانیم مرتضایی…..چوخ گؤزل قیسسا شعرلرینیزله اورک اوخشادیرسینیز.مین یاشایین.

  2. بو گؤزل شئعر لر بیرمه دیم نه یازیم. چوخ ائحساسلی و اورگه یاتان.
    رسسام
    بیر رسسام گؤردوم قلم الینده
    ياشیل يارپاقلاری
    ساری چکیردی!
    يارپاقلار آيریلسین
    قوْل قانادیننان
    اوْنلارین اؤزونه
    اؤلوم چکیردی.

  3. عزیز و حورمتلی تورک شاعیریمیز فریبا خانیم
    شیعرلریزی اوخودوم و اونلاری چوخ بیندیم ؛ اللریز آغریماسین ، شیعرلریز هامیسی دویغولی و اورکدن
    یازیلیب.
    سیزه بو یولدا باشاریلار و اوغورلار اولسون .

  4. سلام. هر زامان کیمی قیسا، اؤز ،دویغو دولو و دیرلی آنلاملار داشییان سؤزجوکلرله شعیری اوخویوجولارا سئودیریرسیز.یاشایین. اوغورلار آرزوسو یله.

  5. سلام ایشق سایتین دیرلی و مؤحترم امکداشلارینا چوخ ساغ اولون بو گؤزل دویغولی شعر لری پایلاشدیغنیز اوچون. سیزینده الریز وار اولسون عزیز خانیم مرتضائی چوخ سئودیم بیری بیرندن گؤزل شعر لر گؤزوموز یولداییدی
    سئویندیم یاشاسین .

  6. اللریز وار اولسون نه گؤزل قیسا شعر لره قوناق ائلدیز بیزی چوخ سئودیم ایشیق سایتیندا سونسوز تشکرلر پایلاشدیغلاری ایچین اوغورلار اولسون مهربان عزیز شاعیره میز … ایهاملار قایناغی

    دونیانین سؤزون توتوب،
    منه وئردییین سؤزو اونوتدون؛
    منیم‌ده سؤزوم وار بو گون،
    سؤزلویم گولوم !

  7. سونسوز تشکرلر مؤحترم خانیم مرتضایی لذت اپاردیم بو گؤزل شئعیر لری اوخودوغوم اوچون اللریز آغریماسین ایشیق امکداشلارندا چوخ تشکر ائدیرم . بو شئعیر چوخ گؤزلدیر چوخ …

    دئدیلر
    سئوه‌نین بوینوزو اولماز؛
    من سئوه- سئوه بوینوز چیخارتدیم ..

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *