یالقیزلیق
حسن ایلدیریم
باخدیق
باخدیق
یالقیزلیغین یاری قارانلیق پنجره‌سیندن :
گؤیلر توتقون
هاوا زوققوم
گؤرونوش آلاتورانلیق .
باغلادیق اوزوموزه یاری قارانلیق پنجره‌لری،
اوچوب تؤکولدوک ایچیمیزه
خارابا داملار کیمی .
آغنادی جانیمیزا توزلو قارانلیق
اوچغون‌لارین آلتیندان
توزلو خاطیره‌لر قالخیب دولوخسوندولار؛
شیغییب چاخناشان قیسیر بولوتلار
یاغماز اولدولار.
باخدیق
باخدیق ایچیمیزه :
اوره‌کلر اپریمیش
ایستکلر قارتیمیش
گؤرونوش
اؤلومه بنزه‌ین قارانلیق بوشلوق!
باغیردیق
باغیردیق قارانلیق دالانلاردا
قارانلیغا آلیشدیق
سویودوق
سوسدوق
گونلرین یالقیز قارانلیغیندا
توموب قالدیق
قارا داشلار کیمی !
تهران ۱۳۷۵
