آد گونو
ائلدار موغانلي
بو گون آد گونوندور ، ييغيليب هامي،
ييرمينجي ياشينا دولورسان ايندي.
گؤروشون بورويوب شاعر دونيامي،
شعيرده سنيندي، سؤزده سنيندي.
داغلار اوجا قويسون پاپاغين بو گون،
جوشسون بولاقلارين قاينار اوره‌يي.
مئشه‌لر زومزومه ائتسين سنينچون،
اوخشاسين کؤنلونو باهار کوله‌يي.
ياشيل مئشه‌لرين، سرت قايالارين-
سينه‌سي اوستونده گول آچدي ايزين.
قيش گونو جارچيسي اولدون باهارين،
صاباحا يؤنلدي اوره‌يين، گؤزون.
سئودا يوللاريندا توش اولدون غمه،
مين فيتنه تؤرتدي “قارا مليک”لر.
بؤيوک گوناه اولموش سئوگي، سن دئمه!
ساراي قانونلاري اولاندا ازبر.
دونه‌نين قادالي، بوگونون قانلي،
سول دؤشون اوستونده داغ واردي يئنه.
باشين فيرتينالي، کؤنلون دومانلي
نه حزين باخيرسان آنا وطنه؟!
ييرمينجي قيش کئچير ياز حياتيندان،
بو گون آد گونوندور، ييغيليب هامي.
ائله بيل دايانيب، يئريمير زامان
گؤروشون بورويوب شاعر دونيامي.
الي بوش دئييلم بو گونونده من،
اؤزومدن قورتاريب، من سن اولموشام.
سنين بولاغ کيمي صداقتيندن-
“آردينجا سورونن کؤلگن اولموشام.”
بهمن 1369