قیسا شعرلر
حسن صفورا
(۱)
من
هله قوجالمامیشام
اوره‌ییمده
بیر جوت سئرچه
جوککولده‌ییر،
بیر جوت گؤورچین
بغولداییر،
بیر جوت کپنک
دونیانین ان گؤزل رنگلرینده
رقص ائدیر؛
من
هله قوجالمامیشام
رویالاریمدا
سن دولانیرسان.
(۲)
ساچلاریندان
یاغیش یاغیر
سن گولنده
من ده
یاغمور اولماق ایسته‌ییرم.
(۳)
حسرتلریم
داغلاردا قالدی
چن گلدی بولادی منی،
یورولمادان
قانادلارینا باخیرام.
(۴)
بیر جوت قومرو
بیرده بیر جوت گیله‌نار
قومرولار باخیر
گیله‌نارلار گولور
منده کی
حئیرانام گؤزلرینه.
(۵)
سن
بیر طرفه
من ده بیر طرفه
نه یاخشی کی
اورتادا بیر یول وار
هر دن بیر
اورا دوشور یولوموز
سالام‌لار باش باشا دییر
دالدادا قالیر آجی‌لاریمیز.
(۶)
نه سن
نه ده آلما آغاجی
نه ده
سندن تؤکولن آلمالار
هئچ بیریسی
اونودولماییب؛
عطیرین
منده چؤرک بیتیریب.
(۷)
اریک دنه‌لرینه
داریخمیشام
مؤحکم سیلکه‌له
تؤکولوم اتک‌لرینه.
