فارس شعریندن ترجمه‌لر
چئویرن: همت شهبازی
ترجمه: همت شهبازی
همت شهبازی
00:00
00:00

(۱)  روزا جمالی

بوتون قاپیلاری اوزونه باغلامیش بیر راهیبه کیمی

سون گئجه

بؤیروم اوسته یاتاندا

گؤبه‌ییمین باغی سنه باغلی‌ایدی.

(قبیرده اؤلموش بیر کیشی‌یم

الی‌نین جیزیقلاری‌نین سایینی ازبردن بیلیرم)

دونیا ناغیلسیز قالدی

سن الیمین داماریندان چکینیردین

کئشکه قاغایی‌لار شکلیمی اودوردولار.

 “الحمرا” تاوانی‌نین آلتیندا

بوتون قاپیلاری اوزونه باغلامیش بیر راهیبه کیمی

بورادا کوچه قادینلاری مندن موتلو

دیشلریم تؤکولموش و گؤزوم کور…

آند اولسون

پنجره‌می قارالدان او قارانلیق گوللره

“والعصرانَ الانسان لفی خُسر”

ساکیت دنیزله اوز اوزه دایانان او ساحیلی گؤروم

بیر ساعاتی کؤکله‌میشلر.

(۲)  یارانیش – آزاده دواچی

آجی بیر گون ایدی

آی ایشیغی یئددی دفعه شوبهه‌لندی اولدوزلارا

یئر کوره‌سی

بطنینده چوروموش چَییردکلری لعنتله‌دی

آغاجلار قایغیسیز اولدولار

قوشلارین روسوایچی کؤچری‌لیینه

و گؤیرچینلرین میتیکال سسلرینه

و ماوی گؤی

هر بیر یولچویا خیسین خیسین آغلادی

آدمین زهرلی وسوسه‌سی تومورجوقلاندی

حَووانین احتیراسلی بوغازیندا

حووانین الینده

بیر یاشیل آلما گؤیردی کدرسیز

آدمدن خبرسیز

و یارانیشین سرت سؤیوشوندن سونرا

انسان‌اوغلو دوغولدو

(۳)  قارغا – مهرداد فلاح

یئنیدن قارغا اولورام… قورخمایین!

قاریلدامایاجاغام

آنتئننا اوزرینه قوناندا

ائکرانلارینیزا خیشیلتی سالاجاغام

پارکدا بیر آغاج اوستونه قوناجاغام

ماسا اوزرینده کی  آج گؤزلری

دویونجاق منه باغماغا قویاجاغام

هئچ بیر کیمسه ایله ایشیم یوخ

بو قارین اوستونه

اؤز ایزیمی اکه‌جه‌یم

و موخبیری اولدوغوم بو قزئت

سیزین الینیزه چاتینجاق ارییه‌جک

داها هارای چکمه‌ییم نه‌یه گرک؟

(۴)  قوش ، انسان – شمس لنگرودی

قوشلار

یاز گلنده

قاناد آچیرلار

انسان

قوشلارینی، قیشلیق ماوی سمادا

اوچوردورلار

بلکه قاری کوروسون

و یازین ایلک آیینا

بیر چلنگ قویسون

قوشلار

یئرین یئددی قاتیندا گزیرلر

دن و یارپاق تاپماق اوچون

انسان

یئری فیرلادیر

تومورجوقلار

چیچکلنمک اوچون

قوشلار

گؤیدن یئره ائنیرلر

انسان

اوره‌یی‌نین سونسوز سازییلا

یئردن یالدیزلی گؤیه

اوچور.

 

(۵)  پگاه احمدی

سو، پنجره‌لر آرخاسیندا سایخاشدیر

قار آلتیندا، بوشقاب دوزورسن

سایخاشدیر

آی گلیر مَلَفه آلتیندا یاتیر

سایخاشدیر

یول گئدیرسن و اوتاغیندا قوز آغاجی‌نین قوخوسو

کیتابلارین و یاشامی‌نین پیشیکلری کیمی سایخاشدیر

و یاشام اؤیله بیر سایخاش اینَک‌دیر کی

بوغازیمین هر یئریندن تپ-تزه سود اییسی گلیر.

روجا چمنکار | ترجمه: 
روجا چمنکار | چئویرن: 
همت شهبازی
اشتراک گذاری در print
چاپ
اوخوماق زامانی: 2 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

فارس شعریندن ترجمه‌لر

همت شهبازی
www.ishiq.net

آذربایجان ادبیات و اینجه‌صنعت سایتی