بو گونلر
رقیه کبیری
بو گونلر
گؤیلوم، افریقا اوشاقلارینین گؤیلو
بیر دویوملوق یئمک
بیر اَلجه چؤرک
بیر قورتوم سود
تورکیه‌ده هر گون قیرمیزی سیقناللار چالینیر
تورکجه کیتابلار نشر اذنی آلیر
امریکا یئنی تحریم‌لره امضا آتیر
اوباما افطار قوناقلیغی وئریر
دلارین قیمتی قالخیر، سینیر
مصیرده تحریر مئیدانی بیرینجی خبر دئییل
یئنی فتوا وئریلیر
ائدز خسته‌لییندن اؤلنلر شهید ساییلیر.
بیر دویوملوق یئمک، بیر الجه چؤرک دئمیرم
بیر قورتوم سود اولماسا بئله،
افریقا سونا چاتمایاجاق
گولوش کوفر ساییلمیر تانریا شوکور!
تانری، گولنده دونیانی یاراتمیش.
-مین ایل اؤنجه افریقالی بیر فلسفه‌چی سؤیله‌ییب بو سؤزو-
فلسفه‌دن آنلامیرام
بو گونلر اَل چاتیلماز تامارزیلاریما یئریکله‌ییرم
گؤیلوم، گولوشونو ایسته‌ییر
گؤیلوم، گؤیلونو ایسته‌ییر.
۹۲.۵.۹
.
