صبح نامازی
محمود قبه زرین
چال عاشیق
چال سازی سسلندیر آماندیر
یوخو آلدی گؤزومو.
گون قارانلیق
سو بولانلیق
اولوب ائل یوردو دومانلیق
سؤندوروب یئل کؤزومو
قهرمان اوغلووون عاشیق داها یوخدور دؤزومو.
سؤنموش او اودلاری مضرابیله اودلاندیر عاشیق!
سووموش او قانلاری قاینات، گؤیه داشلاندیر عاشیق!
قوی نفس گلسین ائله
باغلایاق شالی بئله
دایاناق سئل قاباغیندا
بابالارمیز سایاغیندا.
هایلا گلسین نبی‌نی الده توفنگی ها بئله،
قوچ کوراوغلو ده‌لی‌لرله گله بابک دیریله
هامی وئرسین ال اله!
قوی سنین دوشمانیوین نسلی کؤکوندن قوروسون،
چال ظفرنغمه‌سینی سس بو دیاری بوروسون.
عاشیق آوازی، سازی ائل بوغازی
گئجه‌دن چوخلو کئچیبدیر
قالیب البته آزی
یئتیریب صبح نامازی!
داغلارین باشی منارن،
سازین آواسی آذان.
پرده‌لر حمد ایله سوره
شور شهنازدا قرآن؛
هایلا ستارخان ائلی
اونون ال بیر فامئلی
بو سحر وقتی قیام ائیلییه‌لر،
قیلالار صبح نامازین
بحثی تامام ائیلییه‌لر
تبریز ۱۳۵۶
2 پاسخ
بو شعرین موزیکی ده وار. من بتر آختاریرام. بیراز قدیمی ده ولی اصلا تاپامیرام. محبت الیین اونو منه تاپین
بیر شعر بوقدر گؤزل اولورموش چوخ چوخ حذ ائله دیم .بیر شئی ده دئمک ایستریم کی شعرین گؤزللیگی نظمه نثره باغلی دئیل یئتر کی دوغرو دوروست سؤزلری اورکلره خیطاب ائله سین عینی سایین قبه زرنین بو شعرده یازدیخلاری کیمین.