چئویرن: ایشیق
ترجمه: ایشیق
ایشیق
00:00
00:00

LEAD Technologies Inc. V1.01
آذربایجانیم
هاشم ترلان

 اوزون‌ یوللار گودلسه‌ده‌، عؤمروم‌ بویونجا،

 سنسیزله‌دیم‌ گئجه‌-گوندوز آذربایجانیم‌.

 غربت‌ سیخدی‌، سئیر ائتمه‌دیم‌ سنی‌ دویونجا،

 آغریلاریم‌ اولدو کؤز-کؤز آذربایجانیم‌.

×××

 باشین‌ اوسته‌ قارا یئللر اسنده‌…مغرور

 اوغروندا کی‌ دؤیوشلرده‌ اؤتوب‌ هر آنیم‌.

 سنی‌ “اقوام”‌ سایانلارا دئدیم‌: دایان‌،دور،

 اؤز خالقیمین‌ طالعیدیر آذربایجانیم‌.

×××

 چکیلنده‌ او شوخ‌ آدین‌ قالخدیم‌، دایاندیم‌،

 دیلیم‌ یاساق‌،آدیم‌ یاساق‌ نئجه‌ باخیم‌ من‌.

 توپوق‌ ووران‌ دیلیمده‌کی‌ رنگه‌ بویاندیم‌،

 ای‌ گؤزلری‌ یولدا قالان‌ آذربایجانیم‌.

×××

 صدام‌ چکیب‌ قلینجینی‌ آت‌ اویناداندا،

 اؤن‌ سیرادا آددیملادی‌ دؤیوش‌ کاروانیم‌.

 بوتون‌ ائللر قان‌ گؤلونده‌ اوزن‌ بیر آندا،

 هارای‌ چکدی‌، من‌ ده‌ وارام‌ ،آذربایجانیم‌.

×××

 قانیمیزلا امضالانمیش‌ اون‌ بئشینجی‌ اصل‌،

 دئییر منی‌ اونوتمایین‌ اؤتور دؤرانیم‌.

 دئسه‌ هانی‌ “قورقود دیلی‌” صاباح‌ گلن‌ نسل‌،

 نه‌دیر جواب‌؟ آنام‌ منیم‌، آذربایجانیم‌.

×××

 عؤمور زیروه‌، کؤنول‌ داردا، کؤلگم‌ دیواردا،

 نوه‌لره‌ “پدر بزرگ”‌ اولوب‌ عنوانیم‌.

 آنا دیلیم‌! اولما ملول‌ بیر شن‌ بهاردا

 سیغال‌ وئرر تئللرینه‌ آذربایجانیم‌.

×××

 اود اوغلویام‌، آلوولاردان‌، اوددان‌ یاراندیم‌،

 بابکیمین‌ قلینجیدیر منیم‌ درمانیم‌.

 بیر سئودانین‌ داراغیندان‌ کئچیب‌ داراندیم‌،

 اؤز اوغلؤنام‌، دوز اوغلونام‌ آذربایجانیم‌.

×××

 سیز ای‌ وطن‌ دیاریندان‌ اسن‌ کولکلر،

 اسین‌! دولون‌، اوره‌ییمه‌ سؤنسون‌ هیجرانیم‌.

 صاباح‌ دوغما شوخ‌ دیلینی‌ کسن‌ بیلکلر،

 سجده‌ قیلار شهرتینه‌ آذربایجانیم‌.

×××

 من‌ ترلانام‌، آذربایجان‌ آدیم‌، سانیمدیر،

 او گولمه‌سه‌، من‌ گولمه‌رم‌، سؤکولمز دانیم‌.

 آنا دیلیم‌ بدنیمده‌ آخان‌ قانیمدیر،

 بو قان‌ سنین‌، بو جان‌ سنینن‌ آذربایجانیم‌.

چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد.

آذربایجانیم/ هاشم ترلان‌

ایشیق
www.ishiq.net

آذربایجان ادبیات و اینجه‌صنعت سایتی

آذربایجانیم/ هاشم ترلان‌

ایشیق
www.ishiq.net

آذربایجان ادبیات و اینجه‌صنعت سایتی

آذربایجانیم/ هاشم ترلان‌

ایشیق
www.ishiq.net

آذربایجان ادبیات و اینجه‌صنعت سایتی