چئویرن: رامین جهانگیرزاده
ترجمه: رامین جهانگیرزاده
رامین جهانگیرزاده
00:00
00:00

بیر آز لومپنلیییمیزی باشیمیزدان آتساق

بیر آز اؤزوموزو آتیب توتساق

چوخ دا چتین دئییل

پوست مدرن اولماق

دیلیمیزی اییب

حرفلری اَیری ـ مویرو یازساق

سیندیراجاییق هر نه‌یی

چاینیک‌لری

فینجان‌لاری

جان‌لاری

ساعاتلارداکی عقربه‌لری

سیندیراجاییق بوتون قالیبلری

سیندیراجاییق اتیمیزی تؤکن سوموکلری

سویوناجاییق جیندیر میندیرلاری

سویاجاییق قیلاسه قابیغینیزی

لومبلن لوت اولوب

آلاجاییق میصراعلاریمیزین قاشینی

اؤزوموزو هر مودا سالارکن

دییشه‌جه‌ییک مودئملرینیزی

فورمت ائده‌جه‌ییک درایولاریمیزی

اونیفورملارین آلتیندان چیخیب

فورملاریمیزی تاپاجاییق

اورک ـ موره‌یی

گولو ـ بولبولو

باشینا بوشلاییب

بیر آز دریندن نفس چکرکن

درینله‌شه‌جه‌ییک

بورنوموزا سو دولسا دا

بوغدو – بوغدو اوینایاجاییق

آچاجاییق گؤزوموزو سویون آلتیندا

آخاجاییق آخیلمایان یئرلره

چیخاجاییق اؤزوموزدن

بیته‌جک باشیمیزدان

یاشیل، ساری، قیرمیزی، سؤزلر

پولیس فیشدیراق چالسا دا

دایانمایاجاییق

قورخمایاجاییق

هر نه دوزه‌له‌جک

یولوموزدا قویولار اولاجاق

داش آتاجاییق

یوخولاریندان دیسکینه‌جکلر

رومانتیک قورباغالار

سونرا دالی قاییدیب

بابالاریمیزی قبیردن خورتلادارکن

بیر ـ بیرینین جانینا سالاجاییق

دده‌میزین قوپوزونو سیندیریب

ایسپان گیتاراسین وئره‌جه‌ییک الینه

دده‌میز یئنی هاوا چالماغی باجاراجاق

اژدر عمی لامبادا اوینایاجاق

قوچاق نبی‌نین ائشمه بوغلارینی وورساق دا

قورخمایین قاچاق دوشسه ده

قوچاق قالاجاق

کور اوغلونو آتیندان دوشوردوب

ماکزیمایا میندیره بیلمه‌سک ده

هئچ اولماسا ۵۹«پیکان»ا میندیرمه‌لییک

اینجیمه‌سین آت اوستونده قوچ کور اوغلو

هر نه‌یین جانین آلاجاییق

یئنی‌دن جانلادیب

یئنی‌دن جانلاناجاییق.

چاپ

یک پاسخ

دیدگاهتان را بنویسید

نشانی ایمیل شما منتشر نخواهد شد.

چوخ دا چتین دئییل پوست مدرن اولماق

رامین جهانگیرزاده
www.ishiq.net

آذربایجان ادبیات و اینجه‌صنعت سایتی

چوخ دا چتین دئییل پوست مدرن اولماق

رامین جهانگیرزاده
www.ishiq.net

آذربایجان ادبیات و اینجه‌صنعت سایتی

چوخ دا چتین دئییل پوست مدرن اولماق

رامین جهانگیرزاده
www.ishiq.net

آذربایجان ادبیات و اینجه‌صنعت سایتی