سن گلمه‌دین…
اسماعیل مددی (اولکر)
چای دمله‌دیم
کیشی- شاعرجه سینه!
داغ نفسیندن، ککلیک سسیندن
عطیر آلمیش اوت آرتیردیم.
اوخودوم
کوچه‌لی- یارلی ماهنی‌لاردان آغیز-آغیز
دونیانین دوز اورتاسیندا اولان
آرمود آغاجیمین آلتینی سولادیم،
گلمه دین!
–
سونرا…
آخشام خوسانلاشدی آشنا- آشنا…
یالقیزلیق،
قارانلیق چیراغینی توتاراق قاری دوداغینا یاخینلاشدی
– بیر آرخایینلیق کامانی آتاراق قاشینا-
ایچیمی یاندیردیم!
چنه‌می
دیزیمی
قولومو
اوره‌گیمین اوجاغینا قالادیم!
گلمه دین!
بو آخشام گله‌جکدین!
سیخیلیب سیخیلیب اوره‌گیم
عاشیق آلماسی کیمی کیچیلمیشدی دونیام…
اونو سنینله یاری بؤله‌جکدیم…
–
سسین یوخ ایکن پیچیلدانیردی سؤزلرین،
اؤزون یوخ ایکن
اوزون بؤیویوردو…
ازیلیردی اؤزلوگوم، آزالیردی سسیم
کیچیلمیشدیم!
آیریلیقلا بالتالانمیشدیم!
آیاغیم دالیمجا،
الیم قولومجا گلمیردی!
–
یوخلوق
یووا سالمیشدی گؤودمده
بؤلتلنمیشدیم!
باش بارماغیمی قالدیردیم،
آیی گؤتوردوم،
بئش بارماغیمی قالدیردیم
گؤیو گتیردیم اولدوزلاری‌لا!
سرپدیم قارانلیق عالمین دولاما یوللارینا
گلمه دین!
—
چای سویودو،
ککلیک
اویودو!
سو
قورودو،
آرمود آغاجی سولدو!
…
دیشیسی ایتمیش
کیشی بیر قورد کیمی اولادیم!
سن
گلمه دین!
۲ پاسخ
Yaşa şair, çox gözəl və etgindir. sevərək, bəyəniylə oxudum.
Alqışlar sənə sevgili İsmayıl.
یاشا شاعیر کیشی
نه قدر سئودیم بو شعرینی
یارپیر لارین تر قوخوسو کیمی
سن کیمی
اورمو کیمی
دوز کیمی