آلتی کیشی‌ایدیک
بیر ماسا باشیندا بیر یئرده
اورکلر اوزدن
اوزلر اورکدن قات-قات یالین قات
و هر بیریمیز هامیمیزدان داها دموکرات!
آلتی کیشی
بیر ماسا
پرده‌سیز اولان بیر یئرده!
حقّا دوز – چؤرک
یئمک – ایچمک کیمی
گؤزل ایشلر گؤرولرک
“اوچ گؤزل”دن دانیشیلدی سوفرا باشیندا!
باشلار قیزیشدی
قیزیشینجا دوشدو پرده
دوشونجه بؤلوندو بو آلتیلی ایکی، دؤرده!
دانیشیقلار آراسیندا
ماسانین دادی قاچدی بیر یئرده:
قاریشیقلیق دوشونجه اوچ گؤزل شئیین سیرالاییشیندا!
بیز دئدیک:
– اؤنجه وارلیق
سونرا بایراقدان سونرا چؤره‌ک!
اونلار دئدیلر:
-دونیادا نه بول بایراق!
اؤنجه چؤره‌ک
وارلیق دا چؤره‌کله بیرلیکده گله‌جک!
