سن گلمه‌دين…
اسماعيل مددي (اولکر)
چای دمله‌ديم
کيشي- شاعرجه سينه!
داغ نفسيندن، ککليک سسيندن
عطير آلميش اوت آرتيرديم.
اوخودوم
کوچه‌لي- يارلي ماهني‌لاردان آغيز-آغيز
دونيانين دوز اورتاسيندا اولان
آرمود آغاجيمين آلتيني سولاديم،
گلمه دين!
–
سونرا…
آخشام خوسانلاشدي آشنا- آشنا…
يالقيزليق،
قارانليق چيراغيني توتاراق قاري دوداغينا ياخينلاشدي
– بير آرخايينليق کاماني آتاراق قاشينا-
ايچيمي يانديرديم!
چنه‌مي
ديزيمي
قولومو
اوره‌گيمين اوجاغينا قالاديم!
گلمه دين!
بو آخشام گله‌جکدين!
سيخيليب سيخيليب اوره‌گيم
عاشيق آلماسي کيمي کيچيلميشدي دونيام…
اونو سنينله ياري بؤله‌جکديم…
–
سسين يوخ ايکن پيچيلدانيردي سؤزلرين،
اؤزون يوخ ايکن
اوزون بؤيويوردو…
ازيليردي اؤزلوگوم، آزاليردي سسيم
کيچيلميشديم!
آيريليقلا بالتالانميشديم!
آياغيم داليمجا،
اليم قولومجا گلميردي!
–
يوخلوق
يووا سالميشدي گؤودمده
بؤلتلنميشديم!
باش بارماغيمي قالديرديم،
آيي گؤتوردوم،
بئش بارماغيمي قالديرديم
گؤیو گتيرديم اولدوزلاري‌لا!
سرپديم قارانليق عالمين دولاما يوللارينا
گلمه دين!
—
چای سويودو،
ککليک
اويودو!
سو
قورودو،
آرمود آغاجي سولدو!
…
ديشيسي ايتميش
کيشي بير قورد کيمي اولاديم!
سن
گلمه دين!
2 پاسخ
Yaşa şair, çox gözəl və etgindir. sevərək, bəyəniylə oxudum.
Alqışlar sənə sevgili İsmayıl.
یاشا شاعیر کیشی
نه قدر سئودیم بو شعرینی
یارپیر لارین تر قوخوسو کیمی
سن کیمی
اورمو کیمی
دوز کیمی