ياريمچیليق شعرلريم
صدیار وظیفه (ائل اوغلو)
نیيه بئله سوسوب شعريم؟
سكوت قونوب دوداغيما آغير ـ آغير!
سوسوب شعريم، كوسوب شعريم.
شعر نه‌دير؟
بلكه‌ده شعر،
دفتريمده قورتارمايان ميصراعلاردير
بلكه‌ده شعر،
اعتراضلي بيلكلرين آهنگيله
دوداغيمدا ائنيب، قالخان هجالاردير.
بلكه‌ده شعر،
ائله دئيیل من گؤتوروب يازام قفيل
قاش‌ـ قاباقسيز كلمه‌لري
دفتريمده سطير ـ سطير.
بلكه‌ده شعر،
دفترده يوخ،
غضبيمده، دوداقلانماز هجالاردير.
ائله‌ديرسه،
باغيشلاسين شاعريني
ياريمچیليق ميصراعلاريم،
گله‌جگين چاغلاياجاق دينرينده
تؤره‌نه‌جك ندالاريم،
تؤره‌نه‌جك هجالاريم.
آنجاق سيز آي دوداغيمدا ياريم قالان
یاریمچیلیق شعرلريم!
دوداغيمدا، كيريديلميش دينرلريم
سون گونومده سيزي، سيزي دوداقلارام،
غملي‌ـ غملي هجانيزي
بلكه‌ده من ايسته‌ميشم سون‌نفسده
بير سيزينله وداعلاشام،
بلكه‌ده سيز قورتاريلميش اولسايدينيز ايندييه‌ده‌ك
اؤز عؤمرومون هجاسيني،
دوداقلاييب قورتارميشديم.
سيز آي منيم ياريم قالان شعرلريم!
من نه بيليم
بلكه‌ده‌سيز قورتاراندا
بير شاعرين حياتيندا فاجعه‌لر دوغاجاغميش
دويغولارين درينليگي بير شاعري بوغاجاغميش؛
اگر سيزي قورتارسايديم
اوخوجولار مندن سونرا دئيه‌رديلر
بير شاعرين عؤمور بويو
دوشونجه‌سي بويوموشمو؟
آنجاق،
سيزي دفتريمده ياريم‌ـ ياريم اوخوياندا
اوخويانلار دئيه‌جلكر
شاعر فيكري دنيزميش‌مي، يا قويويموش؟
آخي دنيز ياريم گره‌ك،
آخي قويو ياريم گره‌ك؛
يوخسا دونيا سويا باتار
سيله‌لنسه بوش قويولار، گؤي دنيزلر.
سيز اي منيم دفتريمده ياريم قالان
یاریمچیلیق شعرلريم!
سونسوزلوقلار اؤلكه‌سيندن اوچوب گلن
كلمه‌لريم، ندالاريم!
غضب دولو، عصيان دولو
دوداقلانماز هجالاريم!
من نه بيليم
بلكه‌ده سيز
غضبيني اوره‌گينده اووخارلاميش
اودلو – اودلو شيمشكلريم اولاجاقسيز؛
بلكه‌ده سيز
سون ميصراعسي، سون هجاسي
بيرآنانين دوداغيندا دونوب، قالان
ندالاري قانا باتان باياتيلار اولاجاقسيز؛
خياللاردا يار باغينا قانادلانان
آللي- آللي دورنالاريم اولاجاقسيز؛
بير ده اوميد سماسيندا
قاناد چالان سونالاريم اولاجاقسيز؛
بلكه‌ده سيز
فيرتينالار مژده‌چيسي
شيهه‌سينده عصيان سسي
ايلخي‌ـ ايلخي قير آتلاريم اولاجاقسيز؛
من نه بيليم!
بلكه‌ده سون سطيرلرين
كلمه‌لري، هجالاري
آچيلمايان غونچالارين اووجوندا گيزله‌نيبدير؟
آي غونچالار!
آچين بير ـ بير اووجونوزو،
ديله گلسين آل‌گئييملي شعر قيزي!
بير اوخونسون چيچكلرين طالعلري اووجونوزدان
بيلينسين‌كي هانسي لاله،
هانسي نرگيز،
هانسي سحر آچيلاجاق؟
هانسي آخشام سولاجاقدير؟
هانسي سحر آچيلاجاق؟