اوخوماق زامانی: < 1 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

tarlan
آذربایجانیم
هاشم ترلان

  اوزون یوللار گودلسه ‏ده، عؤمروم بویـونجا،

 سنسیزله‏دیم گئجه-گوندوز آذربایجانیم.

 غربت سیخدى، سئیر ائتمه‌‏دیم سنى دویـونجا،

 آغریلاریم اولدو کؤز-کؤز آذربایجانیم!

 ×

 باشین اۆسته قارا یئللر اسنده مغرور

 اوغرونداکى دؤیوشلرده اؤتوب هر آنیم.

 سنى “اقوام” سایانلارا دئدیم: دایان، دور!

‏ اؤز خالقیمین طالعی‌دیر آذربایجانیم!

 ×

 چکیلنده او شــوخ آدین قالخدیم، دایاندیم،

 دیلیم یاساق، آدیم یاساق نئجه باخیم من.

 توپـوق ووران دیلیمده‌کى رنگه بویاندیم،

 اى گؤزلرى یولدا قالان آذربایجانیم!

 ×

 صدام چکیب قلینجینى آت اویناداندا،

 اؤن سیرادا آددیملادى دؤیوش کاروانیم.

 بوتون ائللر قان گؤلونده اوزن بیر آندا،

 هاراى چکدى، من ده وارام آذربایجانیم!

 ×

 قانیمیزلا امضالانمیش اون بئشینجى اصل،

 دئییر منى اونوتمایین اؤتور دؤورانیم.

 دئسه هانى  “قورقود دیلى” صاباح گلن نسل،

 نه‌دیر جاواب؟ آنام منیم آذربایجانیم!

 ×

 عؤمور زیروه، کونول داردا، کؤلگم دیواردا،

 نوه‏لره “پدر بزرگ” اولوب عنوانیم.

 آنا دیلیم! اولما ملول بیر شأن باهاردا

 سیغال وئرر تئللرینه آذربایجانیم.

 ×

 اود اوغلویام، آلـ‏وولاردان، اوددان یاراندیم،

 بابکیمین قلینجیدیر منیم  درمانیم.

 بیر سئودانین داراغیندان کئچیب داراندیم،

 اؤز اوغلونام، دوز اوغلونام آذربایجانیم!

 ×

 سیز اى وطن دیاریندان اسن کولکلر،

 أسین، دولون اوره‏ییمه، بیتسین هیجرانیم.

 صاباح دوغما شـوخ دیلینى کسن بیلکلر،

 سجده قیلار شهرتینه آذربایجانیم!

 ×

 من “ترلان”ام، آذربایجان آدیم، سانیمدیر،

 او گولمه‌سه، من گولمه‌رم، سؤکولمز دانیم.

 آنا دیلیم  بدنیمده آخان قانیمدیر،

 بو قان سنین، بو جان سنین آذربایجانیم!

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *