tarlan
آذربايجانيم
هاشم ترلان

  اوزون يوللار گودلسه ‏ده، عؤمروم بويـونجا،

 سنسيزله‏ديم گئجه-گوندوز آذربايجانيم.

 غربت سيخدى، سئير ائتمه‌‏ديم سنى دويـونجا،

 آغريلاريم اولدو كؤز-كؤز آذربايجانيم!

 ×

 باشين اۆسته قارا يئللر اسنده مغرور

 اوغرونداكى دؤيوشلرده اؤتوب هر آنيم.

 سنى “اقوام” سايانلارا دئديم: دايان، دور!

‏ اؤز خالقيمين طالعی‌دير آذربايجانيم!

 ×

 چكيلنده او شــوخ آدين قالخديم، دايانديم،

 ديليم ياساق، آديم ياساق نئجه باخيم من.

 توپـوق ووران ديليمده‌كى رنگه بويانديم،

 اى گؤزلرى يولدا قالان آذربايجانيم!

 ×

 صدام چكيب قلينجينى آت اويناداندا،

 اؤن سيرادا آدديملادى دؤيوش كاروانيم.

 بوتون ائللر قان گؤلونده اوزن بير آندا،

 هاراى چكدى، من ده وارام آذربايجانيم!

 ×

 قانيميزلا امضالانميش اون بئشينجى اصل،

 دئيير منى اونوتمايين اؤتور دؤورانيم.

 دئسه هانى  “قورقود ديلى” صاباح گلن نسل،

 نه‌دير جاواب؟ آنام منيم آذربايجانيم!

 ×

 عؤمور زيروه، كونول داردا، كؤلگم ديواردا،

 نوه‏لره “پدر بزرگ” اولوب عنوانيم.

 آنا ديليم! اولما ملول بير شأن باهاردا

 سیغال وئرر تئللرينه آذربايجانيم.

 ×

 اود اوغلويام، آلـ‏وولاردان، اوددان يارانديم،

 بابكيمين قلينجيدير منيم  درمانيم.

 بير سئودانين داراغيندان كئچيب دارانديم،

 اؤز اوغلونام، دوز اوغلونام آذربايجانيم!

 ×

 سيز اى وطن دياريندان اسن كولكلر،

 أسين، دولون اوره‏ييمه، بیتسین هیجرانيم.

 صاباح دوغما شـوخ ديلينى كسن بيلكلر،

 سجده قيلار شهرتينه آذربايجانيم!

 ×

 من “ترلان”ام، آذربايجان آديم، سانيمدير،

 او گولمه‌سه، من گولمه‌رم، سؤكولمز دانیم.

 آنا ديليم  بدنيمده آخان قانيمدير،

 بو قان سنين، بو جان سنين آذربايجانيم!

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *