یاغیشلاریندان زهر امدیم
قارلاریندان آغری.
توپراغیندان یوغرولدو
اوستوموزه آتیلان داشلار،
سویوندان سوزولدو
ایچیمیزه داراشان قریبلیک.
دیلیم آغزیمدا اپریدی
سؤزوم ایچیمده قانادی.
قیشقیرتیم بوغازیمدا دوگون ووردو
بوکدو منی، بوغدو منی.
کوچهلردن آخدی قارا باسمیش خولیا.
درسلیکلردن پیرتلادی ایرینلر
شعرلری اؤلولرین ماهنیسی اولدو…
دردلریمی گیزلی دووارلارا میخلاییرام
اؤزومو دیلیمدن قورویورام.
سنی، سنی سئودیییمی
اوستو باشی آچیق – ساچیق
قاپاغان تریبونلاردان گیزلهدیرم.
من بورالاردا یاشامادیم
من گوله بیلمهدیم
بیزلره گولنلر آغلاتدی بیزی.
آغلار گؤزلر فستیوالی
قارا بایراملار
آجلیق نشئهسی آشیب کئچدی اوغورلوق گولنلری
اوغورلوق تام دادانلاری.
گؤزوموز بیریندن بیر سوچ
دیلیمیز ایچیمیزدن بیر یالان
الیمیز بیرینین بارماغینی چالا بیلمهدی.
تؤکدولر گؤزوموزو
آسدیلار دیلیمیزی
کسدیلر اللریمیزی.
من بورالاردا یاشامادیم
سوروندوم.
