گورولداییر حوزون
ساعاتیمی یئره آتاراق
قاچیرام قارغالیقدان
پیلله- پیلله ائنیرم ایچیمه!
قاپینی ایکی اَللی بوتون گوجومله باغلاییرام؛
گؤزومون ایچینه باخیر قاپی
آنلاییر منی!
ایچیم؛
قورونموش، اَل چاتمایان بؤلگه
اطرافی هؤرولوب هالای¹ چکن قایالارلا…
بورادا هئچ چئشیت² باغلانتی ممکون دئییل
یالنیز شعر اولاشیمی³ وار
بورادا اسکیدَن بیر دیزه⁴ چکنده
دونیا ایشیقلاناردی
بوراسی تانری تار چالان یئر
بیر شعر آلیشدیریرام
اوزاقلاشیرام ساختا سالخیم سؤیودلردن
یاخینلاشیرام اَن گووَندیییم سنه
سن،
شعرلرین دایانمایان اورهیی…
اویاغام و یوخودا
یوخودایام و اویاق
تار چال آییلیم دوستوم!
تانیییم تانینمایانلاری
قارا قویولاری
داشیل ویجدانلاری
تار، تانری، سن
سن، تانری، تار
قاپینی آچمام گرک؛
گوون نفس نفس نفس… یاییلمالی
بیر پیلله، ایکی پیلله، اوچ…
گؤزلریمی یومورام
قوللاریمی آچیرام
گونشه ساریلیرام
تااااار چاااال…
*: بیر نوع رقص
