-استکانی استکانا دئییل، لوطفن شعری شعره وور!
– شعری شعره ووراندا اود یارانیر
– دونیا اودلا، تورپاق‌لا، یئل‌له، سو ایله باشلانیب
– و گؤرونمه‌ین‌لرله…
-آغاجلارین گیزلی اؤلکه‌سی کیمی
آغاجلار یئرین التیندا باشلانیرلار
دورمادان،
هر کؤک یئریین بیر دال‌دیر
اونلار ال‌اله وئریرلر
بئله اولور سارای‌لارین اورتاسیندان
زلزله کیمی، باش قالدیریرلار
اونلار اوچوررر
اوچوروما دایانان سارای‌لارسا اوچورلار
– آغاجلارین مانیفست‌لرینی اوخومالییام
-لوطفن بیر شعر داها
– بوتون شعرلریم
سنین حؤرمتینه گؤرونمه‌ین استکانا دؤنوشوب
– گؤرونمه‌ینلر گؤروننلردن گوجلودورلر
-کؤک کیمی، عشق کیمی
اوره‌ییمیزین ان گیزلی اؤلکه‌سی کیمی
سن اولمادیغیندا، اولدوغون کیمی
-یئرین آلتینی واراقلاماق
تورپاغین عطرینی نشر ائتمک
یئرین التیندا کؤک آتماق
کووووولک اولماق
یئرین اوره‌یینده کی ایچ-ایچه دامارلارلا
یئریمک، یئریمک، یئریمک…
– و سنین دوشونجه‌‌لرینین درینلییینده نفس آلماق
-و سنینله یئرین آلتیندا دا
شهر‌داش اولماق
-سنینله یئرین شرفینه اود ایچمک
قادینقوش اولوب آغاجلاردان
حیات توپلاماق…
توووپ/ لاماق سسینی ائشیدیرسن‌می؟
