دئمه سنسیزلییینین دیشی وار ایمیش
گؤودهیه دار گلن بیر کؤینک کیمی،
گئیینرمیش آدامین جانینی ائینینه.
چیینهیرمیش جییارلارینی،
سؤکرمیش اورهیینی!
دئمه سنسیزلییین الینده بالتاسی وارمیش
پیلته – پیلته دوغرایارمیش آدامین ایچینی.
حسرتی یالادارمیش
آغری چکن سوموکلره.
اوووووی منیم آدی ایتمیش یارالاریم!
کئشکه سادهجه
اؤلومجول بیر یارا اولایدینیز
بیر کره دوغولوب
مین کره اؤلمک نه دئمکدیر؟!
بو آیریلیق دئییل
بو اؤلوم دئییل؛
هر سحر چاغی یاز گونونده
خول- بوداق قیرماقدیر،
کاغاذ کیمی قایچیلاماقدیر
یاغیش یاغاندا یارپاقلاری.
سس لری سودا تورا سالماقدیر گئدیشین،
گؤز گوزگوسونو
گیزلیجه سورگون ائتمک دئمکدیر،
سوروم – سوروم
آرخانجا سوروندورمک دئمکدیر.
