قارشیدان گلن بو تانیمادیقلاریم
نئجه ده تانیش گؤرونورلر!
گؤرونوشلری دوغما گونلریمی خاطیرلادیر
یوروشلری قارانقوشلاری یادیما سالیر؛
اللرینده باهار قیغیلجیملاری
گؤزلرینده سئوگی شعاعلاری
دوداقلاریندا گؤیرچین قانادینین چیرپینتیسی
آددیملاریندا جئیران اورهیینین دؤیونتوسو
یورویورلر نفس آلمادان،
دایانمادان.
قارشیدان گلن بو تانیمادیقلاریم
نئجه ده تانیش گؤرونورلر!
اورهییم، آیاقلاری آلتیندا سسلهنیر
بئینیمده، گورآخار چایلارین شلالهسی دینیر.
ساریلیرام دالغالارین آخیشینا
قوشولورام قارانقوش یوروشلو-
تانیمادیغیم تانیشلاریمین سیراسینا؛
دوداغیمدا یاللی گئدیر قابار چالمیش سؤزجوکلریم
گؤزوم نورلانیر
اورهییمده نئچه ایللیک دویونلرین طیلیسیمی یانیر؛
دوغمالاشیر تانیمادیغیم تانیشلار
کؤکسومده جیغیر آچیر باهار.
دی ۱۴۰۴ – تهران
