مثل واردیر: «یوخا قلم ایشله‌میر»
یالان یازان قلم یادداشین یییر.
دن تؤکولر، اؤرکن توولار، داش دارتار،
دنسیز ده‌ییرمانین داش داشین یییر.
کیشی‌لیک وار- دولت، مال- مقام دئییل،
ائو، سوسوز، چؤره‌کسیز قوری دام دئییل،
واریندان یئمیین بیل آدام دئییل،
اؤز مالین گیزله‌یر، یولداشین یییر.
گؤزوم نه‌لر گؤردو، دونیادا نه‌لر؟!
یئتیم قوزو هر قویونو دورتمه‌لر،
قونشو وار تیکه‌سین قونشویلا بؤلر،
قارداش وار باجی‌سین، قارداشین یییر.
قیشا ساخلار اعتیبارلی قاری نار،
خسته گؤرسه بؤلوب وئرر یاری نار،
یوخسول وار ائوینه گلن بارینار،
وارلی وار ثروتی اؤز باشین یییر.
«هئشته‌سر» مرد اولان دوز نکاه ائیلر،
قادین دا کیشینی پادشاه ائیلر،
اوغول وار قبرینی بارگاه ائیلر،
ائولاد وار داراشیب باش داشین یییر.
