قورویوبدور بولاق‌لاریم،
یانیر دیلیم- دوداق‌لاریم،
دای گلمه‌ییر قوناق‌لاریم،
آدیم دنیز، اؤزوم سوسوز!

هاردا قالیب «صمد»عمی؟
بالیق‌لارا دوشوب غمی؛
سوسوز یئرده اوزمز گمی،
آدیم دنیز، اؤزوم سوسوز!

دونن آدی ائلده «سارا»
بو گون یوخدور درده چارا؛
اوزوم اولسون قارا- قارا،
آدیم دنیز، اؤزوم سوسوز!

آی «شورابیل» جان قارداشیم!
باغریم اولوب قان، قارداشیم!
بیرجه منه یان، قارداشیم!
آدیم دنیز، اؤزوم سوسوز!

دولوب گئدیر، قالیر بوشو،
دای گؤرمورم دیک یوققوشو-
اوچوب گئدن دورنا قوشو،
آدیم دنیز، اؤزوم سوسوز!

گل ای منیم آراز خانیم
یارام درین یانیر جانیم!
دؤزسن یاندیم، دؤزمه یانیم!
آدیم دنیز، اؤزوم سوسوز!

آی اوره‌یی ارک قالاسی!
سن آناسی من بالاسی،
گئدیر آرزولار تالاسی،
آدیم دنیز، اؤزوم سوسوز!

اوره‌ک اولوب پارا- پارا،
اوزور منی یارا- یارا؛
تاپیلمادی چارا، چارا،
آدیم دنیز، اؤزوم سوسوز!

ساوالانین باش داشییام،
سهندیمین قارداشییام،
سوسوزلارین لاپ باشییام،
آدیم دنیز، اؤزوم سوسوز!

هارای ائللر، هارای ائللر!
آلیر منی قارا یئللر؛
خزر داشا، گله سئللر،
آدیم دنیز، اؤزوم سوسوز!

قیشدا چایا بوز یالواریر،
ایندی منه دوز یالواریر،
عزرائیل اوجوز یالواریر،
آدیم دنیز، اؤزوم سوسوز!