گل سنه بیرچای سوزوم،
قند قابینا داد دوزوم؛
پوفله منی چاییندا
دوداق بوزوم، قاش بوزوم!
گل قندلری بؤلوشک،
بیرآز دئییب، گولوشک؛
سئیر ائده‌ک یارپیزلیغی
فینجانلاردا اؤپوشک!
گل چای اوستو گؤزله‌شک،
بوخورلاردا اوزله‌شک؛
سوزولک فینجانلاردان
نعلبکی‌ده سؤزله‌شک!
گل اوتوراق باغچادا،
شکیل‌لرده، تاخچادا؛
بیر چیمن ده دولاناق
سوغات گئده‌ک بوخچادا!
گل خیالا یئر سالاق،
بئشیکده لای- لای چالاق؛
دیسکینمه‌سین، کوسمه‌سین
شووه‌دن یورغان آلاق!
گل اوتوراق چایلاشاق،
گولوشلری پایلاشاق؛
بیرجه سن اول بیرده من
قاققیلدایاق، هایلاشاق!
گل سنه تئل داراییم،
هؤروک- هؤروک آراییم؛
گل بو چای‌دان کئچمه‌یک
آی ساریشین ساراییم!
گل سون قویاق بو سؤزه،
خیال گزه‌ن قاش گوزه؛
تیلیف‌لردن قورخورام
دوشه فینجان‌دا اوزه!
گل بو چای‌دان کئچمه‌یک،
گولوشلری بیچمه‌یک؛
هم چای قالسین، هم ده چای
بال دا اولسا ایچمه‌یک!
