بیر سسه دیکسینیب، گؤز آچدی. ماشینین شوشه‌سیندن گؤزو گونشین ساری یاناغینا ساتاشدی.
– خاتین! نه‌دن بوردا دوروبسوز؟
اولدوز گؤزونو یوموب یئنیدن آچدی. یان شوشه‌نی ائندیردی. قارا بیغلی بیر گنج پولیسی گؤردو. یوخولو- یوخولو سلام دئدی.
پولیس: بوردا دایانماق یاساقدیر. یولو باغلاییبسیز باجی!
اولدوز دوروب صندلینده دیک اوتوردو و گولومسه‌یرک ساغ الینی سول دؤشونه قویدو. ماشینا استارت وورارکن «باغیشلایین» دئدی. آغ پژوسینا سرعتله گاز وئریب، اوزاقلاشدی.
ضبطه ساری الینی اوزالدیب و بیر آرام موزیک آچدی. بیراز یوخوسو قاچمیشدی. گرنشه- گرنشه گؤیه باخیب، دوداغی بیردن قاچدی. گؤزلری سئوگی دولوسو، گونشین یاناغینی قیزارمیش گؤردو.
– بؤیله اوتاندیغیندا، کیمه گؤزون ساتاشیب؟!
ماشینی قیراغا چکیب، دایاندیردی. یئره ائنیب، گونشه باخماق اوچون دایاندی.
گونش اوتاندیغیندان بولودلارین بیریسینی یاواشجا اؤزونه چکدی. اولدوز دؤشونو دالبادال محکم دؤیَجلَدی*.
اولدوز: «جان گونشیم! سئودالی جانینا جانیم قُربان»- دئیه باشینی آشاغی توتوب و تکرار ائتدی:
«شیرین‌دیر لب‌لرین دلبر! او گول رخسارینی گؤستر
یازیق کؤنلوم سنی ایستر، منی الدن سالیر هجران»
گونش جان! عاشق، عاشقی یاخشی دوشونر. یئددینجی گؤیده ده اولسا یوخسا داشلارین اورگینده ده.
اولدوز یولا دوشدو. ماشینی آلیشدیرماق ایسته‌دی آنجاق ماشین هم لال اولدو هم ده آخساق.
اولدوز چانتاسینا ال آتدی.
– وقتیدیر بیرگه سئوگی گؤروشونه گئدک.
اوزاقلاشمادان، بیر مُحتشم خاتین قارشیسینا چیخدی. گؤزل و کلاسیک تورک پالتاری گؤزه چالیردی.خاتینین عظمتی اولدوزو توتدو. اراده‌سیز سلام وئردی.
– سلام یولداش! یول بیریک، چوخ زماندیر «گنجه» سنی گؤزله‌ییر.
اولدوز هئچ سؤز دئیه بیلمه‌دی. خاتینین آرخاسیندا سس‌سیزجه یولا دوشدو، آنجاق فکرینی وئرمیشدی اؤزونه.
خاتین: نه ایسته‌ییرسن؟
اولدوز جوابلایا بیلمه‌دی.
خاتین: «اسرار مخزنی» چوخ آغیردیر.
اولدوزون اورڲینده ائله‌بیل ایلدیریم چاخدی.
خاتین: یولداش! منی گؤندرن، ایسته‌ییب همن آماجا یئتیرم سنی، ایندیسه اؤزو یئتیشدی. نه قدر ده چتین.
اولدوز گونشه ساری باخدی. اۆزو یامان سارالمیشدی. درین نفس آلدی. بوتون بولودلار آغارمیشدی و چوخ اوزاقدا دورموشدو.
خاتین: سوروشمالیسان!
اولدوز: «بئش خزینه» سوراغیندا بورا یئتیشمیشم خاتین!
خاتین: اولدوز! چاغیر منی.
اولدوز حیرت ایله خاتینا باخدی.
خاتین: چاغیر بلکه یول تاپاسان.
اولدوز: خاتین! بیرجه دایانین.
خاتین اولدوزا قِیقاجی باخدی و بو اوزدن نفس آلماق اولدوزا چوخ چتین اولدو.
خاتین: بیر آددیم دا یول گئتمه‌میشیک!
اولدوز دؤنوب دالێیا باخدی. ماشینی گؤرمه‌دی. هئچ گئت- گل یوخ ایدی. نه بیر ماشین، نه بیر آدام. یان- دوره‌سینه دقّتلی باخدی. گؤزلری دوم- دورو سو ایله دولان گؤله ساتاشدی، اورکدن خوشاللاندی.
خاتین: چوخ زماندیر گؤی گؤلده دوروبسان آنجاق بیر قورتوم دا ایچه بیلمه‌ییبسن!
اولدوز: من؟!
خاتین: منی اولدوز چاغیر، چاغیر و بورادان سو ایچ. چاغیر آفاغی…
اولدوز: آفاق؟!
خاتین: «بئش خزینه»یه یئتیشمک اولماز مگر ایگیرمی قورتوم سو ایچمیش اولاسان بو گؤلدن!
اولدوز گؤلون دوۇپ‌دورو گؤی اۆزونه باخدی.
اولدوز: آفاق خاتین! اودلانیرام. چیممک ایسته‌ییرم.
خاتین: ایچمه‌سن باتارسان.
اولدوز: نه‌جور ایچیم؟
خاتین: تانری آدیلا قورتوم- قورتوم ایچ. اوندان سونرا اؤزون بیر آخار سو اولارسان و «اسرار مخزنی» سنی اؤزو تاپار و یوبانیرسا دا «بئش خزینه»یه یئتیرر.
اولدوز، خاتینین آرخاسیندان جوت اللرینی گؤلون اورگینه آپاردی. تانری آدیلا بیرینجی قورتومو ایچیب و سئوینجَک هوشدان گئتدی. یاریسی سودا، یاریسی قیراقدا گونشین اوزرینده یئره دوشدو.
خاتین یئره اوتوردو. اولدوزون باشینی دیزی‌نین اوستونه آلیب، باشینا محبّتلی ال چکدی.
گؤزو یاشلی اوخودو:
«سالاندا سن منی بنده، یاخینلیق اولماسا سنده
اگر قانیمی تؤکسن ده یولومدان دؤنمرم بیرآن»
*دؤیَجلَمک، دؤوَجلَمک: دالبادا وۇرماق، دالبادال دؤومک
