داریخیر کوچه‌میزین دار بوجاغیندا سنسیز
سونا بیر قیزجیغازی آی ایشیغیندا سنسیز
ساچلاری دن – دن آغارمیش، هؤرونوب دویغوسینا
دارانیر، چیپچالانیر، یئل قوجاغیندا سنسیز
یول چکیر گؤزلرینه داغ یاسالار اوزدن ایراق
بویلانیر هؤوشنه‌لر دیل دوراغیندا سنسیز
بورونور شعرلری، بیر- بیر اوخونماز کاغیذا
پاییزین یارپاغی تک نار بوداغیندا سنسیز
آچماییر پنجره‌نی بوردا گونش ساحه سینه
تورآتان‌لار اوخویور یار یاتاغیندا سنسیز
سحری باتدی، قارانلیق دیله‌ییندن ایچدی
داملا- داملا قانینی گون قاباغیندا سنسیز
کلمه‌- کلمه گؤتورور دویغولاریندان چیمدیک
کئفله‌نیر شعرلری سؤز چاناغیندا سنسیز
گلمه‌دین، گونلریمیزدن کؤچوب آیدینلیق‌لار
«آیتای»ین گؤز یاشی قالدی یاناغیندا سنسیز