شیکسته اولدو دوننکی ناماز گؤروشلریمیز
بؤلوندو دوغما وطنده آراز گؤروشلریمیز
قیشین سازاق نفسینده قیروو- قیروو اسیریک
یادیندادی او گؤزللیکده یاز گؤروشلریمیز؟
یالانچی سئوگیلره دالدالاندی ساختا دیلک
بو اَیری یوللارا اولموش تاراز گؤروشلریمیز
قارانلیغا چیله‌ییردی سحر باخیشلارینی
گئییبدی آل- یاشیل الوان بیاض گؤروشلریمیز
گولوشلرین اوخویوردو «فضولی»‌نین غزلین
«یانیق کرم» هاواسی‌لا «حجاز» گؤروشلریمیز
زمانه آیریلیغین سالدی اینجیدیک آرادا
شکیلده رمکه‌لنیب ناز ها ناز گؤروشلریمیز
دوگونله‌ننده باخیشلار سماده «آیتای» اوچون
اوره‌ک سئوینجینه دؤندو کاغاذ گؤروشلریمیز