دولانیر یوللاردا
اوتورور یئرلرده
اوزانیر یاتاقدا
بوتون انسان‌لار کیمی؛
باخیر، گولور، آغلاییر
یازیق انسان‌لار کیمی.
نه گؤزو گؤرور گؤرنلر کیمی
نه قولاغی دویور دویانلار کیمی
گؤرور، دویور
یازیق انسان‌لار کیمی.
دانیشاندا اؤزگه دیلده دانیشیر
یازاندا اؤزگه دیلده یازیر
دانیشیر، یازیر
یازیق انسان‌لار کیمی.
ایچینده بیر بوشلوق وار
بئینی قاریشیق، کؤنلو دورغون،
عؤمور بویو داش داشیمیش بیر کؤله کیمی یورغون.
اینانجینی دوشونجه‌ده،
گله‌جه‌یی کئچمیشینده باتیریب
کیملییینی، اؤزلویونو، دیلینی، یولونو، هر زادینی ایتیریب
اؤزونو بیر درین، قارانلیق قویویا سالیب
اوجسوز-بوجاقسیز بوشلوق ایچینده آسیلی قالیب
هر یئرده وورنوخور، هر یئردن قاچیر
اؤزونو آسماغا بیر میخ آختاریر!
