«گل بؤلک دونیانی ایکیلیکده بیز / دره منه دوشسون، داغی سن گؤتور!» (نبی خزری)
«گل بؤلک دونیانی ایکیلیکده بیز!»
سئوینج سنین اولسون، غم منه قالسین.
داغلاری، اوبانی بؤلک یورد با یورد،
بولاق سنین اولسون، چم منه قالسین!
ایسته‌رم دونیانی گزه‌ک باش باشا،
یوکون من گؤتوروم، آد سنه قالسین!
بوتون اینسانلاری سئچک بیر به بیر،
تانیشی سن گؤتور، یاد منه قالسین!
قیزینماق ایسته‌سن بیر اوجاق قوراق،
کولو منیم اولسون، کؤز سنه قالسین!
آرتیق بو دونیایا باخماق ایسته‌سن،
دئییرم بو ایکی گؤز سنه قالسین!
دونیانین دؤلتین، وارین ایسته‌مم،
بوتون وار- دؤلتیم قوی سنه قالسین!
نه‌یه آرخالانیم سؤیله عزیزیم،
وفاسیز هر نه وار قوی منه قالسین!
آل سنین، شال سنین، قارا خال سنین،
گئیین، بزه‌ن، دوزن، پوز سنه قالسین!
یاپیشاق قول- قولا گزه‌ک بیز قوشا،
صفاسین سن گؤتور، توز منه قالسین!
یوللار انیشلی‌دیر، یوللار یوخوشلو،
یوخوش منیم اولسون، دوز سنه قالسین!
عؤمور دونیاسیندان، عؤمور باغیندان
اللی‌نی من دریم، یوز سنه قالسین!
