آرامیز – آراسیز
سن هر آن یانیمداسان،
موبایلیمین گؤرونتوسونده
موتلو گؤرونورسن
موتلو.
یئشیل بویالی دوداقلارین
ییرتیق ییرتیق ساری کؤینگین
جیریق جیریق لی شالوارین
داها مان دئییل کی،
مان‌لار کؤچدو – قاچدی
یوخسوللوق نه باهالاشدی!
آرامیز – آراسیز
سن شیکاگودان آنلاین
من کندیمیزدن،
گؤروشوروک
ثانیه‌ده – دیقه‌ده؛
یوللار بو قده‌ر گوده
یوللار بو قده‌ر قیسسا
یوللار بو ….!
من ائویمیزدن دولانیرام سیزین شه‌هری
سن ده دادیرسان کندیمیزین پاییزینی
توت آغاجی‌نین ساریشین یارپاغی
شیکاگو پارکینا دؤکولور،
پارکین سرینلییی
پنجره‌میزدن اوتاغا؛
سن دنیز قیراغی قو قوشلارینان
بالیق دوتورسان
بورداسا
قارقالار هورکور مندن
آرامیز ائله بو!
آرامیز آراسیز
سن
الیمده‌سن
گؤزومده‌سن
جیبیمده‌سن
سن جیبیمده تهرانی فیرلانیرام
سن جیبیمده خیابانی دولانیرام
کوچه‌نی
یاغمورو
قاری – بورانی
اورانی – بورانی …
سن جیبیمده
آخشام اولور
موبایلیمین زنگینده آچیلیرسان
جانلی جانلی
اوتاغیما آچیلیرسان
آچیلیرسان
یاتاغیما آچیلیرسان
آچیلیرسان
هر آنیما آچیلیرسان
آچیلیرسان آ،
قارقیش بو چاغا
بو زامانا
بو گونه
آجی آیریلیغی دادام
قویمادی
منه – سنه
آیریلیغا دا حسرت قالدیق بئله؛
اؤزونو قورو
ساچلاری‌نین رنگی هک اولماسین
ساچلاری‌نین
رنگی
هک اولماسین…
