گئتمک ایسته‌ییرسن گل دایانما گئت،
یورو آیاقلارین اوزومه گولسون!
گئتمک ایسته‌ییرسن گل یوبانما گئت،
سویوق اللریمدن الین اوزولسون!
گئتمک ایسته‌ییرسن یول آچیق اولسون،
دوشمه‌سین آی باختین بورانا، قارا!
آیریلیق یوللاری اوزون اوزادیر،
آرخایین گئت، قویما یول سنی یورا!
گئتمک ایسته‌ییرسن گئرییه باخما،
گؤزله‌مه آرخانجا یول اوسته گلیم!
تکجه بیر ال اوزاد الیندن دوتوم،
سون نفسین آلسین الیندن الیم!
گئتمک ایسته‌ییرسن گئری‌دن اوزول
دوغرانسین ایچینده من بؤلوم- بؤلوم!
سنینله ده یالقیز سانیردیم اؤزوم،
نه اولاجاق سنسیز سورماسان گونوم!
سندن قالان بوتون خاطیره‌لری
آرخانجا سو کیمی یولا سپه‌رم!
بیرگون گئری دؤنسن گؤیرسین دئیه
کوچه‌ده توپراغا یادداشت اکه‌رم!
