سن ای سوت‌امر کؤرپه،
ای فلسطینلی آج اوشاق!
من سنین جیلیز بدنی‌نین پارچالارینی،
سنین امزیگینی، گلینجیکینی،
درس کیتابلارینی، چانتانی
قان گؤلمجه‌لرینده
و خارابالیق‌لار آراسیندا گؤردوم!
من سنین یانیب داغیلمیش مدرسه‌نی گؤردوم کی،
اونون خاطیرینه
مئشه چاققالیندان آمان ایسته‌ییردی
اخته‌لنمیش مئشه آسلانی.
سن ای آنا، ای فلسطینلی حامیله باجیم!
من سنین قیوریم ساچلارینی،
من سنین نجیب دؤشلرینی
و یانینا دوشموش یانان کؤرپه‌نی
خارابالیق‌لار آراسیندا گؤردوم!
سن ای فلسطینلی قیز!
من سنین بارماغینداکی نیشان اوزوگو ایله
خینالانمیش اللرینی
قان آرخی‌نین دیبینده گؤردوم!
سن ای فلسطینلی یولداشیم،
آتام، دوستوم!
من سنین جادار- جادار اولموش کؤکسونو،
قانا بوغولموش بدنی‌نی
اود یاغیشینین آلتیندا گؤردوم!
اونا گؤره کی،
«دموکراتیا»نین قارا بولودوندان
و «غرب» جبهه‌سیندن
«بشر حاقلاری» باغیرتیسی‌یلا
باشینا اود و «بیاض فسفر» یاغیشی یاغاندا
یاردیمینا گله بیلمه‌دیم،
سنه بیر چتیر هدیه وئره بیلمه‌دیم.
من سندن اوتانیرام
«منی باغیشلا!» دا دئمیرم!
آنجاق سن ده بیلیرسن
من ده سنین کیمی بیر دوستاغام.
بو دونیا بویداکی زنداندا
کاپیتالیسمین قوخوموش، قارانلیق سللولوندا
الی باغلی، آیاغی قانداللی بیر اسیرم.
ائله بیر زنداندا کی،
سرمایا دئوی
حقیقت مله‌یی‌‌نی دوغراییر
و غزه کؤرپه‌لرینین قانینی «یَهُوَه» آیاغی آلتینا تؤکور.
من فلسطین یارالاریندان آخان قانین دامما سسینی
هر یاندان ائشیدیرم،
خارابالیغی، اودو، توستونو، قانی گؤرورم.
و دموکراتیا برکتیندن باغیریرام:
ای اوشاق، ای قادین، ای کیشی!
ای شهید اولموش فلسطین!
من سندن اوتانیرام
داریسقال قفسیمی سیندیرا بیلمه‌دیم
سرمایا زندانی‌نین کؤهنه نیظامینی پوزا بیلمه‌دیم
قصابین الیندن بالتاسینی آلا بیلمه‌دیم
قورقوشون قازانینی آشیرا بیلمه‌دیم،
بونا گؤره ده
سرمایا کافتارلاری
سنی قارانلیق سللولدا
و داریسقال قفسده
آج – سوسوز پارچالادیلار.
من قفسیمی سیندیرا بیلمه‌دیم
سن ایسه یالقیزجاسینا
اریمیش قورقوشون قازانیندا
حقیقتله، آزادلیقلا برابر
«سالخیم بومبا»لارین یاغیشی آلتیندا یاندین، اریدین.
من ایسه ماتمینده
یالان چکمه‌لر آلتیندا
آزادلیق حسرتینده
و سندن اوتاناراق باغیردیم:
لعنت اولسون بئله «دموکراتیا»یا
بئله «بشر حاقلاری»نا
بو فیریلداقچیلیغا!
