(۱)
یالقیزلیغیمین
دریسینی اینیمدن سویورام
نسیمی چیخیر آستاریندان
سویولموش دری‌لره بورونموش
چیلپاق جانی
(۲)
اسکی‌لردن قالان
سؤنموش
سویوق
بیر اوجاغام
اورمان آراسیندا،
کولومون آلتینداکی کؤزلری
پوفلوینه آلقیش
(۳)
اؤزومدن داشیرام
داشینیرام
اؤزومون «اؤز»-ونه جالانیرام
بو داشما
بو داشینما
منی «اؤز» اوزاقلیغیمدا ایتن
یاخینلیغا آپاریر.
(۴)
ساچلاری‌نین
اؤزگورجه‌سینه دالغالانماسی
منه
اؤلکه‌مه
بیر قورتولوش بایراغی
اونا آرتیق بیر دار
بیر قاپیق*
*قاپیق: حلقه دار
(۵)
من ایله او
ات ایله دیرناق
کیمی‌یدیک
دیرناغیمی چکدیلر
آرامیزدان آراز یارالی
قان آخدی
یک پاسخ
سلاملار سایقیلار سایین استاد بزرگ امین
یورولمایین هر واقتینیز خئییر. هر زاد اؤز یئرینده اما ….
بو ۵ تیکه شعیرین هره سینده ایریجا گؤزللیکلر دویدوم
یالنیزلیغیمین دریسین سویدوم نسیمی چیخدی / سؤنموش اوجاغام کول آلتدا کؤزلریمی پوفلوینه آلقیش / اوچونجونده داشماق و داشینماق یاخینلیق و اوزاقلیق پارادوکسو./ ساچلارین دالغالانماسی منه قورتولوش بایراغی و اؤزگه سینه دار اولماق/ و سونونجوندا ات دیرناق اولماق دیرناق چکیلمک ده آرازین قانلی آخیشی اوره ییمه یاتدی. عشق اولسون سیزه. اوغورلار