۱. مئشه‌لر
مئشه‌لر
اوشاقلیق شیلتاقلیقلاریم
دوننلنمیش باخیشلاردا
گؤزدن ایتدی.
بوغازیم صاباحلاری هایقیردی
قولاقلانیب او ائشیتدی.
ایسلاق نوتلاریمین آیناسیندا
اوشاقلیغیم یئنه بیتدی.
۲. اؤپوشوموز
صاباح
اؤپوشوموزو
اکیزتایی دوغاجایام.
ایندی سانجیسینی
آجییرامسا
آغریسینی
قوسورامسا
تورکولریمی
سوسورامسا.
۳. اؤلوم سوزگه‌جی
اؤلوم سوزگه‌جیندن:
سنی
اؤپوشوموزو
یاشامی
سوزولدوک:
وارلیغین دامارلارینا.
۴. دئییشیم
من
بوزلاریمی اریییرم
وارلیغیمین وارلیغینا.
هؤرولموش بولودلاردان
گونشیمی ساچیرام
قارانلیغیما
من
ایلان کیمی قابیغیمی سویولورام!
سنی دوغولورام!
۵. دونیا کندی
بارماقلاریم
-keyboardون دویمه‌لرینی
یاللیلانیر،
بیر قاریش دونیا کندینی اووجلانیرام
چاغریلمامیش قوناقلار
آخینیر ائویمه.
هئچ ده منه اوخشامایان بیریسی
منی دوغور.
2 پاسخ
یاشاسین اسکی دوستوم مسعود بی.تبریزده کئچیرتدیگیمیز گونلری اوزله دیم
سایین جعفر بَی قیسا شئعیرلرین اؤلونو دیریلده بیلیر! وار اولون عزیز، شن یاشایین.