چئویرن: ائلدار موغانلی
ترجمه: ائلدار موغانلی
ائلدار موغانلی
00:00
00:00

دولان گل دولانباج یوللارین آیریجیندان
حسرتی گؤزونده قالسین آیریلیغین!

دولان گل!
ایتیرمه دولایلاردا
قارانقوشا توخودوغون یاز نغمه‌لرینی!
کؤکسونده دومانی،
گؤزونده یووا قورموش گومانی اریت یوللار بویونجا،
آرینسین دولانباج یوللارین سینه‌سی-
باخیشلارا سانجیلان تیکانلاردان!

دولان گل
یوللارینا اوچسون یاز نغمه‌لی قارانقوش‌لار،
باخیشلارینا بویانسین چیچک بویالی اوچوش‌لار!
سحر- سحر
سوت گؤلونده یویونسون
آرزولارین سوت امر کؤرپه‌لری،
چال- چاغیرا چاغیرسین بنؤشه‌لر سحری.

دولان گل!
اوغلان چاغی‌دی سحرین؛
قویما ایلغیملارین گؤرونوشونده-
سوسوزلوغونو سویونسون سولغون باخیش‌لار،
پرن-پرن اولسون گونش آرغاجلی ناخیش‌لار!

دولان گل
آزماسین قارانقوش‌لار-
دولای‌لاریندا دولانباج یول‌لارین!
دولان گل
حسرتی گؤزونده قالماسین
قانادلانان قول‌لارین!

اردیبهشت ۱۴۰۰- تهران

چاپ

مجله ایشیق شماره 4

آذربایجان توی‌لاری

مجله ایشیق شماره 3

آذربایجان و مهاجرت مساله‌سی

مجله ایشیق شماره 2

آذربایجان قفه‌خانالاری

مجله ایشیق شماره 1

آذربایجان معلم‌لری و تحصیل مساله‌سی

باشقا اثرلری

دیدگاهتان را بنویسید

نشانی ایمیل شما منتشر نخواهد شد.

دولان گل!

ائلدار موغانلی
www.ishiq.net

آذربایجان ادبیات و اینجه‌صنعت سایتی

دولان گل!

ائلدار موغانلی
www.ishiq.net

آذربایجان ادبیات و اینجه‌صنعت سایتی