بو گئجه‌م
یئنه ده تورکوسوز قالیر
ماهنی‌لار دونیامدا
قارا گئییب‌لر
سؤکولمور یالقیزلیق گئجه‌لریمدن
هؤرولوب زامانین کلفچه‌سینه
کیم بیلیر حالیمی
تکجه
نار
اوره‌یی قاناییر هر آن
آنام نارلاریله
حالیما قان آغلاییر آن به آن!
گورولتو دوشور بوتون جانینا
قانینی-
سوران آن زهرلنیر سویولان نار!
چیلله گئجه‌سی‌دیر –
ناغیل دئییر:
آتام پاییزین سونو
یئنه ده
بو گئجه کرم یانیر،
بو گئجه
قارپیزلار پارچالانان آن
داغیلیر آخار قان ایچرینه هر زامان؛
دولانیر چیلله ننه‌سی
کوچه به کوچه
گلمه‌ییر،
قیسیلیر کؤهنه بیر ائوده
جوجرمیش دویغولار سارسیلیر،
یانیر
جان آتیر بلکه‌ده اؤلمه‌یه یئنه!
دوغروسو آیریلیق اؤلومجول اولور
تانینماز سئوگیمیز-
اؤز آرامیزدا!
هامی چیلله‌نی چپیک چالار کن
کیم بیلیر ال‌لریم نه یاشیر او آن !
بو گئجه کؤچورم قارا گئجه‌دن
گئدیرم بیر ایشیق اؤلکه‌یه بلکه
یئنه ده بو چیلله آجی گئچیلدی
سن یوخسان
سیخیلیر هر آن چیلله‌لر
سن یوخسان آجی‌لار رول آلیر
یئمک‌لر
آدام‌لار
باخیش‌لار بئله
چاتلایان قارپیزدا اینان آجی‌دیر
هر شئی آجی‌دیر
یاشام آجی‌دیر…
سیخیلیر چیلله‌نین اوره‌یی یئنه.