کؤلگه‌لر سریلیب شه‌هرین اوستونه؛
اوره‌یی ایرینلی،
گؤزو کینلی؛
نفسینده ظولمت قوخوسو،
سسینده گئجه قورخوسو.
قینیندا گیزله‌نیب سایریشان اولدوزلار
آیین جانیندا قیزدیرما وار…
کؤلگه‌لر سریلیب شه‌هرین اوستونه؛
کوچه‌لرین سینه‌سینده دؤیونور دیسکینتی‌لر،
ائولرین اوستونه یاغیر تنهالیق؛
پنجره‌لرده تور قورور هؤرومجک‌لر،
مورگوله‌ییر شه‌هر.
کؤلگه‌لی‌دیر زامان، گؤی، یئر؛
دووارلار آرخاسیندا
چیلپاق قالمیش آرزی کیتابینی واراقلاییر شاعر؛
کؤلگه‌لی‌دیر‌کیتاب دا،
واراق دا،
اوتاق دا.
اوره‌یینده یاز یاغیشی‌نین هاواسی،
باخیشیندا سئوگیلی‌لر پیچیلتیسی،
گوموشو ساچلاریندا دولاشارکن آیریلیق نسیمی
«من بو جهانه سیغمازام»- دئیه
قانادلانیر سحره دوغرو.
دالغاسیز بایراق‌کیمی آسیلی قالیر ائیواندان؛
بارماقلاری دویونلو،
گؤز‌لری سحرین پنجره‌سینه تیکیلی،
آغزی آچیق،
سؤزو یاریمچیق؛
بوغازیندا دویونله‌نن «آه» سؤزومو
یوخسا «آ ز ا . . .» ؟!
آذر ۱۳۷۶
