ایکی آغاج یول اوستونده بیتمیشدی
چوخ اوجالیب بویا باشا یئتمیشدی
یول اوستونه کؤلگه لری دوشوردو
یولدان گئچن اوردا بیر ایله شیردی
چوخ دینجه لیب کؤلگه دن حظ آلیردی
چوخلو زامان اوردا یاتیب قالیردی
بیر آغاجی ایچیندن قورت یئمیشدی
همان آغاج یولداشینا دئمیشدی
بئلیم سینیر گل سن منه یاردیم ائت
الیمدن توت قویما دوشم داده یئت
قوی قولومو سالیم سنین بوینونا
آل سن منی قوجاغینا قوینونا
من ده بیر آز جانا گلیب دینجه لیم
گل قویما کی من ده خیلی اینجه لیم
اوندان سونرا سنه زحمتیم اولماز
یاخشیلیق دا قیامته هئچ قالماز
بیر گون سنین ایشین دوشر یولداشا
ایشین دوشر قونشو،قوهوم،قارداشا
یولداش اونا اوز گؤزونو تورشوتدو
چوخ غئیظ‌له باخیب اونو قورخوتدو
هاوا قارالمیشدی یاغیش یاغیردی
یولداشینین باشینا چوخ چیغیردی
دئدی کس سسینی آخماق دانیشما
مندن بئله سفیه سفیه یاناشما
من اؤزوم ده زور لا آیاق اوسته یم
سن اوت اولسون من ده سنه توستویم
من آلانمام سنی ده اوز چیینیمه
هیچ واخت گئتمز بو سؤز منیم بئینیمه
همان زامان بیردن ایلدیریم شاخدی
او آغاج دا یولداشینا بیر باخدی
ایلدیریمنان طوفان وئردی ال اله
آغاجین جانینا دوشدو ولوله
بیر زور وئریب اونو سیندیریب ییخدی
ایلدیریم دا اونون ایشینه باخدی
آغاج دوشدو اورداکی سیم اوستونه
بیلینمه‌دی کیم دوشدو کیم اوستونه
اورداکی سیم تلگرافین سیمی دی
ماحال‌لارا بیر خبرچی کیمی دی
سیم قیریلدی کسیلدی رابیطه‌لر
گون باتمامیش رئیسه چاتدی خبر
رئیس او آن ایکی نفر گؤندردی
او آغاجی اوزو اوسته دؤندردی
تئلگرافین سیمینی باغلادیلار
سیناق اوچون رابیطه ساخلادیلار
سونرا اونلار بیر بیرینه باخدیلار
یاپیشقانی سیم اوستونه یاخدیلار
ایشچی دؤنوب یولداشینا سؤیله دی
بو آغاج دا بوردا قالماسین- دئدی
اگر قالسا اؤز یئرینده بو سایاق
بیر گون یئنه سیمی قیرار بو مایماق
یاخشی دی کی اونو تیکه‌له‌یک بیز
بیر دفعه‌لیک راحات اولسون فیکریمیز.
