عینالی‌لیق(۱)
آنیرقوجام

سیرخابدا
اتک ده اود یانیر
توستو قالخیر گویلره.

توستو گئدیر
داغ قالیر ائللره.
۱

اورادا، «کهلیک» ده
عاشیق چالیردی
نغمهدن
بیر داملا دامدی.
اوره ییمده قالدی!
۲

عینالی تبریزه باخار
تبریز عینالی یا

سئل اوردان آخار آشاغی
ائل بوردان قالخار یوخاری
۳

«قونیا»یا
سیرخابدان دئییرلر؛
سرری اولاراق
یول وار.
یئرآلتی …!

خزینه‌لر،
گئدیر، گلیر …
۴

عینالی گئجه‌لر
آغیردیر.
داریخما!
سحر یاخین‌دیر.
۵

دنده باخدیق
اوردان
مچیده آخدیق
یامان یورغونودوق
بیلمدیک نه واخت یاتدیق
یعنی گئجه بقعه ده قالدیق.
۶

شوخلوق

امام آیاغیندان
قالخدیق.
آخشام خوجادایدیق.
ایندی بیزه «امام خواجه»
دئییرلر!
۷

عینالیدا چیراغ یانیر
عینالیدا یامان یانیر
عینالیدا چیرآغ یانیر
عینالیدا اویاق یاتیر
۸

اول آخشام
اَتکده بیری قارپیز
ساتیردی.
هله کهلیکده داغچی
چایدانا یارپیز آتیردی.

قارپیزدان شیرین…
اوغلانا قیز قاش_گوز آتیردی

قاش بیردن قارالدی!
۹

آرحیم آغا عینالیدایدی.
عینالی چوخ صمیمی و عالمانه.

بختورلیک حس اولونوردو.

کوراوغلودان صحبت کئچیردی…
گئدیردی …
تاریخ واراقلانیردی.

*رحیم رئیس‌نیا
۱۰

اورادا
دوزگون* امامت ائتدی.
تبریزه ناماز قیلدیلار!

*دکترصدیق
۱۱

خاماچیله* اوسته گؤروشدوک
اوندان عکسلر سالدیلار…
چوخ سالدیلار.
من دوشدوم!

*بهروز خاماچی
۱۲

بقعه ایچیندن
باخاندا
محراب آیری تهردیر.
گؤرونن اسکی شهردیر.

دونیالارجا تاسفله‌لرله بو صون‌واختدا
بقعهنین تاریخی محرابین گؤتوردولر!!
۱۳

سجادهنی چوله سالدیق
«پیران»دا دستماز آلدیق
آیدان پارلاق، گولدن گؤزل
یار ناخشین گؤیلره سالدیق

*پیران= ترلان حوضو
۱۴

قبیر وار اوردا
قبیر … داغدا
قیزیل وار اوردا
قیزیل قبیرده
داغ وار اوردا
۱۵

بو داغ دولای _ دولای‌دیر.
اووجودا دامار _ دامار
جیغیر _ جیغیر.
باشی بلالی داغدیر.
ایکی گؤزو آغلاردیر.
بو حوض
«ترلان»ین
بو بولاق دا
«کهلیک»ین.

گؤرن جوما گونو
قوناقلایاجاقمی منی ده.

اَل آچیقدیر عینالیم.

*ترلان حوضو بقعهنین دالی درسینده یئرلشیر و سابق پیران حوضو دئییرمیشلر. باخ ؛ روضات الجنان، ابن کربلایی
۱۶

بو سلطان
گونده نئچه بویادا
دون دگیشیر

سحر آغ گئییر
گون اورتا قیرمیزی‌دیر پالتاری
سونرا گؤیه چالیر
گئییمی
گئجه چیلپاقلارین ائویندن
باخسان اونا
بورونوبدور قارا دونا.
۱۷

اتگینه
مینلر چیلپاق صیغینیر
اورگینین اودو
باشینداکی اوجاقدان
دالیب کؤکسونه
یاندیریر
یاندیریر
اتگین هله ده…
۱۸

آلاتوراندا چیخدیق داغا
چای چانتامیزدا باللی خاما
گونش سرگیسین سرنده، بیز
باخدیق اوجا دنده، ونیارا
۱۹

عینالیا قار دوشدو
خاطریمه یار دوشدو
بادامدان اود یاندیردیق
گؤزومه بیر نار دوشدو
۲۰