اوخوماق زامانی: < 1 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین سس فایلی هله حاضیرلانماییبدیر. بو یازی‌نی اؤز سسینیزله اوخویوب بیزه گؤندره بیلرسینیز.

اوچ شعر

صدیار وظیفه «ائل اوغلو»

1- وینه
اوستاد «حبیب فرشباف»ا اتحاف

«وینه» ده، «تامام» دا بیر آنا کیمی
کؤنول موزئیینه چاغیریر منی.
یانیر خیالیمدا چاخماقسیز، قووسوز
«وینه»یله «تامام»ین دیلک خرمنی.

«تامام» شاعرلرین میصراعلاریندان
قیزیل شفقلره اوچان بیر لاچین،
هله‌ده قلبینده اسیر شبهه‌لر
وئریر سازاقلارا اؤز گلین ساچین.

«وینه» گؤزلرینده آغیر مورگولر،
نه بیرچال- چاغیری، نه ازدهامی.
شیغییر اوستونه باشسیز کولک‌لر،
یاخیرحادثه‌لر قیزی«تامام»ی.

«تامام»ین دویغوسو، دوشونجه‌لری
آسلانیر «وینه»نین بوز هئیکلیندن.
بیر دری، بیر قورو سوموکدن ساوای
نه قالیر «تامام»ین اؤز هئیکلیندن؟!

«وینه» دان یئرینده سؤکولن سحر
مین آرزی گوللنیر بویاقلاریندا.
سونسوز باهاریمین یاشیللیق‌لاری
یئله‌نیر مقدس قاواقلاریندا.

«تامام» آرزیلارین انتظار قیزی،
عؤمرونده اوچ دؤنه قاچمیش دوداغی.
او، یئرده قانادسیز چیرپینان بیر قوش،
او، گؤیده سرگردان پالید یارپاغی.

2- پاییز آخشامی

پاییز آخشامی تک اریییر خیال
غربت اؤلکه‌لرین اوفوقلرینده.
هیجران یوللاریندا، یورغون باخیشلار
آوارا قوش کیمی بوینو چیینینده.

گومانلار داری تک سپیلیر یولا،
دویغولار قوش کیمی یولو ائشیرلر.
غربت آخشامیندا، سفیل ـ سرگردان،
باخیشلار نه یازیق جوگگولده‌شیرلر.

من ایچه بیلمه‌دیم سئوینجلریمی
غربتده مین کره نشعه‌لندیم‌سه.
قالیر لاله‌لرین اوووجلاریندا
منیم سئوینج پاییم، هله ندن‌سه!

3- بولودلار

اوچور کولک‌لرین قانادلاری‌لا
قونور ذیروه‌لره او بوز بولودلار.
یاشیل چمن‌لرین، بنؤوشه‌لرین
سرین قوجاغیندا یاشاییر اونلار.

هاردا گیزله‌ییرلر، هاردا بیلمیرم
او د‌لی بولودلار شیمشک‌لرینی؟!
یوخسا اوره‌کسیزمی یاشاییرمیش‌لار
بس کیمه وئردیلر اوره‌کلرینی؟!

اونلار، اوستوموزه آغلاییردیلار
زامانین حؤکمونده گؤردوکلرینی.
گزیب دیار ـ دیار عکس ائدیردیلر
قانلی قامچی‌لارین سوردوکلرینی.

او چیلغین بولودلار قاماشدیرماسا
اگر بو گؤللرین گؤی گؤزلرینی،
نه قوش قاناد چالار، نه جئیران اورکر،
نه ایلهام یوخودان اویادار منی.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *