اوچ شعر

صدیار وظیفه «ائل اوغلو»

1- وينه
اوستاد «حبیب فرشباف»ا اتحاف

«وينه» ده، «تامام» دا بير آنا كيمي
كؤنول موزئيينه چاغيرير مني.
يانير خياليمدا چاخماقسيز، قووسوز
«وينه»يله «تامام»ين ديلك خرمني.

«تامام» شاعرلرين ميصراعلاريندان
قيزيل شفقلره اوچان بير لاچين،
هله‌ده قلبينده اسير شبهه‌لر
وئرير سازاقلارا اؤز گلين ساچين.

«وينه» گؤزلرينده آغير مورگولر،
نه بيرچال- چاغيري، نه ازدهامي.
شيغيير اوستونه باشسيز كولك‌لر،
ياخيرحادثه‌لر قيزي«تامام»ي.

«تامام»ين دويغوسو، دوشونجه‌لري
آسلانير «وينه»نين بوز هئيكليندن.
بير دري، بير قورو سوموكدن ساواي
نه قالير «تامام»ين اؤز هئيكليندن؟!

«وينه» دان يئرينده سؤكولن سحر
مين آرزی گوللنیر بوياقلاريندا.
سونسوز باهاريمين ياشيلليق‌لاري
يئله‌نير مقدس قاواقلاريندا.

«تامام» آرزيلارين انتظار قيزي،
عؤمرونده اوچ دؤنه قاچميش دوداغي.
او، يئرده قانادسيز چيرپينان بير قوش،
او، گؤيده سرگردان پاليد يارپاغي.

2- پاييز آخشامي

پاييز آخشامي تك ارييير خيال
غربت اؤلكه‌لرين اوفوقلرينده.
هيجران يوللاريندا، يورغون باخيشلار
آوارا قوش كيمي بوينو چيينينده.

گومانلار داري تك سپيلير يولا،
دويغولار قوش كيمي يولو ائشيرلر.
غربت آخشاميندا، سفيل ـ سرگردان،
باخيشلار نه يازيق جوگگولده‌شيرلر.

من ايچه بيلمه‌ديم سئوينجلريمي
غربتده مين كره نشعه‌لنديم‌سه.
قالير لاله‌لرين اوووجلاريندا
منيم سئوينج پاييم، هله ندن‌سه!

3- بولودلار

اوچور كولك‌لرين قانادلاري‌لا
قونور ذيروه‌لره او بوز بولودلار.
ياشيل چمن‌لرين، بنؤوشه‌لرين
سرين قوجاغيندا ياشايير اونلار.

هاردا گيزله‌ييرلر، هاردا بيلميرم
او د‌لي بولودلار شيمشك‌لريني؟!
يوخسا اوره‌كسيزمي ياشاييرميش‌لار
بس كيمه وئرديلر اوره‌كلريني؟!

اونلار، اوستوموزه آغلاييرديلار
زامانين حؤكمونده گؤردوكلريني.
گزيب ديار ـ ديار عكس ائديرديلر
قانلي قامچي‌لارين سوردوكلريني.

او چيلغين بولودلار قاماشديرماسا
اگر بو گؤللرين گؤي گؤزلريني،
نه قوش قاناد چالار، نه جئيران اوركر،
نه ایلهام يوخودان اويادار مني.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4