۳ شعر
صدیار وظیفه «ائل اوغلو»

۱
اؤپر منی

اریتسه ده کدر منی،
بوکولمه‌میش بئلیم، هله.
بیر قیلینجام اؤز قینیندا،
قورخار مندن اؤلوم، هله.

یاراندیم درده دؤزم من،
آغری – آجییه گؤزم من،
باشدان آیاغا سؤزم من،
آچیلمامیش دیلیم، هله.

گل گؤره‌سن سرتلییمی،
فلک ایلن گولشیمی،
بیر اوره‌یی یوخا کیمی،
دانیشیرام حلیم ،هله.

آرزیلارین گؤز یاشیندا،
ایستکلرین آز یاشیندا،
اؤپر سنی یوز یاشیندا
آی «ائل اوغلو»، ائلیم هله.

۲
داریخیرام
یامان داریخیرام سنه آ ذیروه
هانی داشلی جیغیر، یه هر بئل قایا!
یامان داریخیرام سنه آی قه‌جل
گل یاپیش الیمدن آپار اوبایا!

یامان داریخیرام سنسیز آی توراج،
سنده دیر کؤنلومون پیریلتیلاری!
گل واغان آپاران آرزیلاریمین
گئنیش تارلاسیندا اوچوشاق باری!

یامان داریخیرام سنه آ ساحیل،
دلی فیرتینالار، لپه‌لر هانی!
یامان داریخیرام سنسیز آی آراز،
اؤپم دوداغینلا آذربایجانی.

۳
بیر گون
بیر گون آرزوموز بویودو،
قوجالاق، قوجا دونیادا.
دوستوم! اوره‌ییم سویودو،
قوجالدین قوجا دونیادا.

داغ دولاشدیق یوللار آشدیق،
یوز یول اؤلومله یاناشدیق،
نه یورولدوق، نه ده چاشدیق،
یوللاری هاچا دونیادا.

یاشادیقجا سون باهاری،
اونوتمایاق دوستو – یاری،
«ائل اوغلو»نون آرزیلاری
بلکه گول آچا دونیادا.