منی سنسیز قویما بئله …
بابک قوجازاده
یئنه دوشوب «سن» کؤنلومه
اللرین دیمیر الیمه
پاییز یاغیر بو ایلیمه
منی سنسیز قویما بئله …
مئشه لرده چیچک اولوم
آی اوزونده لچک اولوم
خیال بس‌دیر، گرچک اولوم
منی سنسیز قویما بئله …
اعتیبار یوخ گلن گونه
قورخورام کی فیکرین چؤنه
داریخیرام دؤنه دؤنه
منی سنسیز قویما بئله …
ساچلارینا داراق چکیم
هؤرویونه اولدوز اکیم
قوشا گزیر بوردا هر کیم
منی سنسیز قویما بئله …
شعریم سن سن، سؤزوم سن سن
یاش گؤزومده، گؤزوم سن سن
روحوم، جانیم، اؤزوم سن سن
منی سنسیز قویما بئله …
