سن منی گؤتوردون…
آیدین باخیش
سن منی گؤتوردون بیر باده کیمی
اؤتورسن الیمی نئیله‌ملی‌یم؟
آدینی اوستومدن گؤتورسن آخی
من دلی کیمین‌له اوینامالی‌یام؟
الین اللریمده، گؤزون گؤزومده-
هله اولا- اولا گؤزوم دویانمیر.
بو سئوگی بوینومدا نه‌دیر؟ بیلمیرم!
دیلچی‌لر هله‌ده آدین قویانمیر.
سپیل اوره‌ییمه اولدوزلار سایاق،
قارانلیق کؤنلومه بیر آز دان دوشسون!
اؤلمه‌سه گؤزومون آجالمیش قوردو
سن گؤیدن گونش دوش، یئره قان دوشسون!
چکیل گؤزلریمه بیر شکیل کیمین،
من اؤللم گؤزومدن دوشوب سیلینسن!
آخین دامارلاریم اؤلو خورتداسین،
آخی غملریمه پینیسیلینسن!
یاپیش اللریمدن، لاپدا زنجیر اول،
قوی قالسین اوستومده اسارت اییین!
الین اللریمدن قاچیریلسا، کاش-
سریلسین بوینوما گیوتین‌لییین.
