ایکی شعر
یوسف جوادی
۱٫ بنؤوشه
خزان قوجاغیندا سولان بنؤوشه،
اوره‌یی پاییزدان دولان بنؤوشه،
تورپاغین آغریسین آلان بنؤوشه،
یاغیش کدرینی سیله‌جک دایان!
ساچلارین دولاشیب قارانلیقلارا،
گونش تومارلارسا چیخار آشکارا؛
گؤرسه‌ده یایلیغین بورونوب قارا
خینالی باشیندان بیله‌جک دایان!
یئللر قانادیندا اسن گونلرین،
یاغیشی باغرینا باسان گونلرین،
گونشی تئلیندن آسان گونلرین،
یئنه ده او گونلر گله‌جک دایان!
هله تئزدی بئله سولما بنؤوشه!
گله‌جک بیزیمدیر اؤلمه بنؤوشه!
گلنه بیر قونچا گولمه بنؤوشه!
باهار دوداغیندا گوله‌جک، دایان!
۲٫ لاله‌لر
یایلیغی چیگنینده اسن لاله‌لر،
کدر کؤلگه‌سیندن کوسن لاله‌لر،
گونشی باغرینا باسان لاله‌لر
ایسته‌ییر قیزارا، ده‌یمه سن آللاه!
گوناهسیز گوللرین ساراسی لاله،
یاخیلیب اوزونه قاراسی لاله،
لاب او اوره‌گینین آراسی لاله
قویگیلان کؤزره، ده‌یمه‌سن آللاه!
وطن تورپاغیندا بیتن لاله‌لر،
یئرین قوجاغیندا یاتان لاله‌لر،
هره‌سی بیر قان‌دی باتان لاله‌لر
نیشانسیز مزارا ده‌یمه سن آللاه!
